Fann brukarutstyr ved barnehage
Politiet natt til laurdag: Sint mann, tjuvfiske og funn av brukarutstyr.
Fredag morgon rykte politiet ut til ein institusjon i Os der ein mann var aggressiv.
– Mannen blei tatt hand om av politiet og transportert vekk frå staden, fortel politibetjent Thomas Juulseth ved Os lensmannskontor.
Fann brukarutstyr
Litt seinare fredag ringte det ein person inn til politiet og fortalte at han har funne brukarutstyr for narkotika i nærleiken av ein barnehage.
– Vi har ikkje vore på staden, men det kan sjå ut som det var ei hasjpipe som var funnen. Vi kjem til å følgja opp saka.
Det har i lengre tid lagt ei jolle ved kaien i Os hamn. Den har no blitt fjerna av hamneansvarleg i Os kommune.
– Om nokon saknar jolla så kan dei ta kontakt med oss eller Os kommune, seier Juulseth.
Tjuvfiske i elva?
Ein innringar fortel på kvelden at han har sett 2-3 menn som ser ut som dei driv tjuvfiske i Oselvo.
– Vi var ute og patruljerte då meldinga kom, og kjørte for å undersøkja, men fann ingen på staden.
Natta har vore roleg for politiet, og russen, som starta feiringa denne veka, har dei ikkje merka noko til.
– Det har vore russearrangement i Bergen i går, så Osrussen har nok vore med der.
– Vi har ikkje fått inn meldingar på russen og håper det held fram slik, seier Juulseth.