Fann tre flaskepostar!

I helga er det fleire som har rydda plast og anna avfall i skjergarden i Os, etter initiativ frå Os kommune.

• Les òg: Fylte båtane med «profesjonelt» avfall

Ordføra Marie Lunde Bruarøy (H) var sjølv og plukka boss, blant anna i Moldvikane (mellom Ervikane og søre neset av Sørstrøno), og fann heile tre flaskepostar.

• Hugsar du: Iselin Røttingen Møller flaskepost frå Orknøyane (2011)

– To av dei tre var daterte, dei var frå 2007 og 2009, men ingen av dei hadde reist langt, fortel Marie.

Dei tre flaskepostane var frå Strøno, Øyane og Selbjørn. Det eldste daterte var frå Strøno i 2007.

– Eg kjenner litt folk i Strøno, der halve slekta mi er frå, og rekna meg ut til kven det kunne vera. Då ho skreiv flaskeposten var ho 9 år, no er ho 19. Då eg ringte til ho så hugsa ho framleis då ho og venninna kasta flaskeposten ut i håp om at den skulle segla langt av garde, fortel ordføraren.