Får 100.000 til Havfest
... men framsyninga er framleis ikkje sikra.
Då kommunestyret handsama tertialrapporten tysdag kveld kom òg søknaden for Havfest om støtte til oppsetjing i samband med festspela i Bergen på bordet.
- Rådmannen ba oss i formannskapet å ta ei eventuell støtte på årets rekneskap. Eg foreslår difor at vi tar eit gruppeleiermøte, innleia ordførar Terje Søviknes (Frp).
Har denne veka på seg
Etter at dei politiske leiarane hadde fått samsnakka kom ordføraren tilbake med eit forslag om å støtte Havfest på lik linje med dei andre større lokale arrangørane (Osøren Blues & Jazzfestival, Rock 'n LoL, WT Litteraturfestival, 60 grader Nord) og innvilga 100 000 kroner frå dei auka skatteinntektene.
- Det er flotte greier.
- Eg håpar imidlertidig at det er nok til at vi kan få det til, seier Havfestkomponist Glenn Erik Haugland til Midtsiden.
Haugland og Opera Omnia har denne veka på seg til å skaffe til veg dei midla som trengs for å få til framsyninga.
- Festspela har satt ein frist til 1. november. Vi er i dialog med eit par andre potensielle samarbeidspartnarar òg, så forhåpentligvis kjem vi i mål.
Ønskjer ein ryddigare struktur
Det var ikkje alle partia i kommunestyret som var einige i at kommunen skulle gje midler over bordet.
- Om vi prioriterar Havfest betyr det samstundes at vi nedprioriterar noko anna.
- Eg er kritisk til heile prosessen rundt desse søknadane og skulle ønska at rådmannen hadde presentert ei shortlist som vi kunne prioritera frå når dette ikkje kjem med i den ordinære budsjettprosessen.
- Det ryddigaste hadde vore om alt hadde vore løfta opp samstundes, hevda Helge Olav Nygard (Krf).
Han fekk støtte i det prinsipielle frå Lars Atle Skorpen (Ap) som var samd i at det hadde vore ein keitete prosess. Skorpen forslo difor ein underskotsgaranti på 100 000 kroner i staden.
Kommunestyret var langt på veg einige i at ein burde få til ein betre struktur på søknader får arrangørar av kultur- og andre arrangement i Osbygda. Kanskje gjennom faste søkandsfrister, men valde like vel å støtta Havfest med 100 000 kroner no. Berre fire representantar (1 Høgre, 2 KrF, 1 Sp) stemde mot.