Får 2,2 millionar til helsetenester til unge

Regjeringa vil styrka helsetilbodet til barn, unge og deira familiar.

Bjørnafjorden kommune har søkt om 2.803.500 kroner i øyremerkt tilskot, og får innvilgd 2.242.800 kroner, opplyser Helsedirektoratet.

Pengane skal gå til helsestasjon og skulehelseteneste.

Askøy har søkt om nesten 2,7 millionar, og får heile beløpet. Øygarden har søkt om 5,5 millionar og får nesten 4,4 millionar kroner.

– Glad kommunane satsar på dette

I alt er det 313 kommunar som får midlar. Til saman er det 952,5 millionar kroner som blir delte ut gjennom kommuneramma til å styrka helsefremjande og forebyggande tenester til barn og unge.

– Grunnlaget for god helse blir danna tidleg. Helsestasjonane og skulehelsetenesta bidrar til tryggleik og forebygger fysiske og psykiske plager på eit tidleg tidspunkt. Eg er glad kommunane satsar på dette, seier helse- og omsorgsminister Ingvild Kjerkol i ei pressemelding.

– Vi vil løfta tilbodet innan psykisk helse over heile landet. Derfor skal vi legga fram ein opptrappingsplan for psykisk helse. Vi skal både sjå på det som fremjar god psykisk helse, og jobba for at hjelpa blir meir tilgjengeleg og nærmare folk.

– Ikkje meir enn venta

296 søknadar for treårsperioden 2021 – 2023 er vidareført. Det gjeld også for Bjørnafjorden kommune.

– Sånn eg les dette, er det midlar vi også har fått tidlegare år frå Helsedirektoratet, og som vi driftar etter allereie, seier kommunalsjef Line Rye.

– På landsbasis er dette kanskje eit løft, men for vår del er beløpet lågare enn før, då det er fleire kommunear som søkjer, og fleire som deler på potten.