Får ikkje vera med

Med bakgrunn i den siste tidas uregelmessighet på ferja mellom Hatvik og Venjaneset stilte Tone Hepsøe (Ap) spørsmål om Os kommune har drøfta problemet.

– Det har vore mykje driftsstans over fjorden til Fusa. Er det gitt noko tilbakemelding frå Os kommune, gjerne saman med Fusa kommune på dette, undra Hepsøe.

Gjeld ikkje berre Fusa

Ordførar Marie Bruarøy (H) fortalde at det ikkje berre er Fusaferja som har vore problematisk denne våren. Også sambandet til Austevoll har vore råka av fleire kanselleringar, og både Austevoll og Tysnes er urolege for tilbodet når nye el-ferjer skal settast i drift frå 2018.

– Ordføraren i Austevoll har tatt kontakt med fylkeskommunen og satt hardt mot hardt og ville ha eit møte. Der var det òg naturleg at Fusa og Tysnes blei med, og at Os blei invitert med all den tid to av ferjene går frå Os.

Var ikkje ønskja med

Tilbakemeldinga kommunen fekk, var at Os kommune ikkje var ønskja med på eit slik møte.

– Det var ikkje ønskeleg at Os skulle vera med i møtet med Fylkeskommunen. Det blir tydelegvis separate møter med kommunene det gjeld. Eg er litt overraska, men stiller vi stiller oss sjølvsagt bak den uroa som er i dei andre kommunane, forklarte Bruarøy.

– Kven er det som ikkje ønskjer at Os kommune skal vera med, undra Eirik André Hesthamar (Frp).

– Frå fylkekommunen står det at vi ønskjer ikkje å ha med fleire ordførarar i dette møtet, svara ordføraren og las frå mailkorrespondansen med fylkeskommunen og dei andre kommunane.