(Ill. foto: KVB)

Far til 16-åring krev førarkortet tilbake

– Eg har engasjert advokat. Dei to frå UP vil bli meldt for framferda si, seier faren etter gårsdagens fartsmåling på Ulvensletta.

Av: Kjetil Vasby Bruarøy

Torsdag morgon blei ein 16-åring på lett motorsykkel stoppa av utrykningspolitiet, mistenkt for å ha køyrd i 92 km/t i ei 50-sone på Ulvenvegen.

Etter omtale av saka har faren til 16-åringen kontakta Midtsiden-redaksjonen.

– Eg reagerer kraftig på framferda til dei to UP-betjentane, i tillegg stiller eg meg undrande til målinga, fortel han.

Målt i tre ulike fartssone

– Målinga dei skal ha gjennomført er visst ein sokalla dør til dør-måling, ei måling som er gjennomført i tre ulike fartssoner, 50, 80 og 60-sone.

UP skal ha vore i sivil bil, og blei forbikøyrd av 16-åringen i 50-sona ved Kloppamyra. Begge hadde retning Kolskogen, og politiet la seg på hjul. Dei følgde motorsykkelen gjennom 80-sona, inn i 60-sona og stoppa 16-åringen først i Kolskogen.

Fortener straff

– Då eg sjølv fekk snakka med ein av betjentane, og spurde om kva måling dei hadde, spurde dei om eg ikkje var meir interessert i korleis han køyrde. Dei sa han hadde køyrd forbi ei rekkje med bilar over Ulvensletta, men då sonen min reagerte gjekk dei tilbake på dette. Det var visst berre UP han hadde køyrd forbi.

– I tillegg skal dei ha vore ufine då dei stoppa han. Detaljar vil eg ikkje innpå no, men eg reagerer på det eg har fått høyra.

– Sonen min fortener straff for å ha køyrd for fort, men seier sjølv at han ikkje køyrde fortare enn 70 km/t i 50-sona. Eg har engasjert advokat, og krev at han får førarkortet tilbake. I tillegg vil eg melda dei to betjentane for sjikanerande framferd. Det er greit at dei blir irriterte over å bli forbikøyrd, men dei må likevel kunna oppføra seg.

 

Fleire saker