Fasadeløft hos Fagerthun
– Vi held også på med oppgradering innandørs, seier huseigar Anders Fagerthun, som sjølv står for malararbeidet.
Bildeserie:
Hjørnet med det karakteristiske tårnet på Osøyro endrar i desse dagar farge.
– Det er mange år sidan det har vore grått no. For 13-14 år sidan gjekk vi frå kvitt til gult, no syntest eg det var på tide med ei endring, seier huseigar.
– Vi ville ta denne jobben for to år sidan, men det har vore litt uvisse både i samband med nattklubb-saka som gjekk mange ekstrarundar og med Os kommune sine ambisjonar for heile kvartalet.
Huseigarane avslo i sommar det kommunale eigedomsselskapet Os Bygg og Eigedom sitt bod.
– Førebels er det inga avklaring, vi får sjå kva som skjer i framtida. Uansett var huset no modent for oppussing.
Nesten fullt belegg
Fagerthun-bygget består av tre ulike hus. Den eldste delen, trebygningen der nattklubben Catten held til, blei bygd i 1927.
Bygget der Kleiven og seinare LOL heldt hus kom i 1935. Kleiven eig framleis på baksida, men Fagerthun eig fasaden mot Øyro. I tillegg høyrer lokalet Guris Frisørsalong bruker med.
– Det er 300 kvadratmeter på gateplan. Vi eig tomta òg, seier Fagerthun.
Fleire huseigarar i sentrum er i desse dagar i forhandlingar med Opplysningsvesenets fond, som har gått frå feste til innløysing til både privatpersonar og kommune.
Kjem ny restaurant
I lokalet på gateplan som har stått ubrukt og tildekka den siste tida er det framleis plan om å opna restaurant.
– Dei er i søknadsfasen enno og har eit firma som hjelper til med prosessen, fortel huseigar.
Pussar opp loftet
Det einaste ledige lokalet i huset er i tredje etasje i trebygningen.
– Her er vi nesten ferdige med oppussing. Gips har kome på, men det står igjen noko maling og litt anna arbeid.
– Loftet har eit fint skråtak og tårnet er del av lokalet. Dette kan bli eit spennande kontor, meiner Andres Fagerthun.