Feil veg i rundkøyringa
Politiet laurdag: Ei kvinne er mistenkt for å køyra bil i rusa tilstand, ein syklist blei angripen av laus hund, og rusa personar blei observert virrande rundt i kontrollsona på Søfteland.
Natt til sundag kom politiet i Os over ein bil som køyrde feil veg i rundkjøringa i Os sentrum.
– Vi fekk stoppa bilen og tok med oss bilførar til legevakten for vi mistenkte han for å vera rusa, fortel vakthavande på Os lensmannskontor.
Bilførar, ei kvinne i 20-åra, ville fått eit forenkla forelegg om ho berre hadde køyrd feil. No vil ho i staden bli meldt for promillekøyring og politiet har oppretta sak på hendinga.
Rusa personar i kontrollsona
Rett før klokka fem laurdag fekk politiet inn ei melding der innringar hadde observert fleire personar han oppfatta som rusa i kontrollsona på Søfteland.
– Det stod to vogntog på staden og personane skal ha virra rundt desse.
I ein ny melding til politiet fekk dei no beskjed om at personane gjekk og bar rundt på ein annan rusa person.
– Då vi kom på staden fann vi ingen, berre sjåførane til vogntoga som hadde kviletida si, fortel vakthavande, som seier det er mogleg at det har vore forbipasserande personar eller nokon i ein annan bil.
Angripen av laus hund
Ein ung mann oppførte seg truande mot ein vektar på Amfi Os i sju-tida laurdag kveld.
– Han var ikkje valdeleg men hadde truande oppførsel og vektar vurderer å melda saka.
Ein syklist som var på veg frå Lysefjorden mot Ulven fekk seg ein støkk laurdag kveld då han plutseleg blei angripen av ein laus hund.
– Syklisten blei ikkje skada, men han opplevde hunden som aggressiv.
– Ein laus hund som går langs bilvegen kan vera skummelt for fleire, seier vakthavande.