Feira jul på supplybåt
Inge Sundfjord (19) feira i år jula vekke frå familien for første gong.


Før jul oppfordra Midtsiden.no lesarar som feira jul på ein litt spesiell plass i år, å senda rapport frå feiringa si. Her er ei helsing frå ein som var om bord på ein supplybåt julaftan.
- Eg er matroslærling på supplybåten Skandi Captain, og har i år for første gong i mitt 19 år lange liv feira jul vekke frå familien, skriv Inge Sundfjord i ei helsing til Midtsiden.no.
Han fortel om kjempegod julestemning hos heile mannskapet, som har kost seg om bord i båten medan den låg til kai i Kristiansund.
- Alle har verkeleg gjort sitt beste for at det skulle bli ei fin feiring. Og det blei det, sjølv om vi ikkje fekk feira saman med familiane våre i år, seier Inge.
Han mønstra på 15. desember og blir på jobb til 12. januar, så då blir det også nyttårsfeiring på båt.
Midtsiden.no tar imot helsingar frå julefeiringar heile romjula.