Feirar i hagl og sol

April kan vera lunefull når det gjeld vêret. Rett før Os Turlag sin jubileumstur skulle ta til laurdag klokka 12 kom ei skikkeleg haglbyge over Osøyro.

– Det kan nok vera at det er nokon som trekte seg når dei såg haglbyga, men det er folk ute i løypa allereie, fortalde Arvid Øvreeide, leiar av turlaget, då Midtsiden var innom start og målpunktet på Kyrkjeflaten litt etter klokka 12.

Då hadde byga gitt seg og sola titta såvidt fram gjennom skyene.

Kaffi og kake

Jubileumsarrangementet er eit samarbeid med Os kommune og Frivilligsentralen.

– Vi har 8-10 folk ute i løypa godt synlege med vester frå turlaget om det er nokon som lurar på noko eller som treng hjelp. Vi har òg folk ståande på Tøsdal, slik at folk ikkje tek snarvegen over innmarka.

– Her nede stiller frivilligsentralen opp og opner det gamle kommunehuset når folk kjem innatt frå turen. Der bli det òg servert kaffi og kaker.

Premiering på quiz

Langs turen har laget lagt ut fleire poster med ulike oppgåvar.

– VI har fått mange flotte premier frå mellomanna kommunen og MX Sport. Dette blir trekt ut blant dei som svarar rett på oppgåvene, forklarte Øvreeide i det han ønskja eit nytt følgje god tur.