Fekk 100.000 kvar

Formannskapet har for 2011 ein tilleggsløyvingspost på 1,4 millionar kroner for å ta hand om ymse tiltak og søknader som kjem inn i løpet av året.

I møtet tysdag behandla politikerane dei første løyvingane for 2011.

Både Osøren Blues & Jazzfestival og Os Internasjonale Skultursymposium fekk, nær sagt tradisjonen tro, tildelt midlar. Dei to arrangementa fekk 100.000 kroner kvar i tråd med innstillinga frå administrasjonen.

I driftsbudsjettet?

Dette fekk Espen Aspenes (Frp) til å stilla spørsmålstegn om ikkje desse midlane burde ligge i det ordinære driftsbudsjettet under kultureininga i staden for som ei tilleggsløyving.

- Vi veit jo at det kjem søknadar kvart år, så då kunne det like gjerne vore budsjettert med i utgangspunktet, påpeika Aspenes.

Marie Bruarøy (H) var redd for å binda opp midlar i budsjetta.

- Om økonomien vår skrantar mykje vil det vera dumt å binda oss, hevda ho.

Aspenes fekk støtte frå Jostein Bondevik (Krf) og Eirik Neverdal (TvS) som syntes det kunne vera ein god idé å få midlane planmessig i budsjettet. Bondevik påpeika at dei ikkje måtte øyremerkast desse to arrangementa særskilt.

- Forhåpenlegvis vil Oseana generera auka aktivitet, så det kan vera andre arrangement i framtida som vil trenge støtta like mykje, hevda Bondevik.

Norvald Skåtøy (Ap) var langt på veg einige med dei alle.

- Det er viktig å signalisera at vi har ei ramme med kulturmidlar til denne type arrangement, sa Skåtøy, samstundes som han delte Bruarøy si bekymring for å binda seg.

Inventar til kommunestyresal eller skule?

Ei av dei andre postane i forslaget frå administrasjonen var å bevilge 220.000 kroner til inventar til kommunestyresalen.

Ønsket frå administrasjonen si side var å investera midlane i nye stolar, bord med straumuttak og lerret i møtesalen i samband med opprustinga som er gjort på rådhuset. Formannskapsmedlemmane, med unntak av TvS og KrF, hadde tidlegare gitt klarsignal til dette per e-post.

Eirik Neverdal (TvS) ser behova for oppgradert utstyr i kommunestyresalen, men meinte at det var feil å bruke midlane der og fremma i staden forslag om at dei skulle brukast til inventar i skulen.

Stemte mot eige parti

Dette fekk han tilslutning til frå Norvald Skåtøy (Ap), sjølv om Arbeiderpartiet på e-post hadde gått inn for løyvinga.

- Eg føler det gir feil signal å bevilge oss sjølv 220.000 kroner til nye pultar når vi veit at endel inventar i skulen er minst like gamle som det 20 år gamle utstyret i kommunestyresalen, hevda Skåtøy.

Terje Søviknes stadfesta at det kun var TvS og Krf som gjekk mot investeringa i e-postutvekslinga og kunne vera einig i at det ville vera spesielt om salen berre skulle nyttast av 35 kommunestyrerepresentantar seks gonger i året.

- Men vi må ikkje gløyme at dette er eit stort og viktig møterom som også dei ute i einingane nyttar til møter og samlingar, påpeika ordføraren.

- Investeringa er like mykje for resten av organisasjonen sin del, hevda han.

Det nye inventaret blei vedteken mot Ap, TvS og Krf sine stemmer.

I tillegg vedtok formannskapet å bruke 200.000 kroner til bevertning av 600 inviterte gjestar i samband med opninga av Oseana (mot TvS og KrF sine stemmer som meinte det burde gå av byggerekneskapen).

Det blei og vedteken 75.000 kroner til å dekka barnetalsmannen i Plan og bygningsutvalet og 200.000 kroner til forvaltningsrevisjon 2011. Desse blei einstemmig vedteken.