Fekk Fana på slep
Lysekloster sine nysignerte briljerte i braksiger - og lynvingen frå Årdal var banens beste.
Bildeserie:
Lysekloster låg på 4. plass før dagens lokaloppgjer mot storklubben på andre sida av Fanafjellet, Fana låg på 7. plass med éin kamp mindre spelt.
I vår blei det 0-1-siger til Lysekloster, i dag sto heimelaget med 4 poeng på dei 3 siste kampane, Fana med 7.
Sportsleg leiar Svein Kollen og venstreback Sigve Rørstad fyller til saman 100 år i dag (70/30). Det gjekk ikkje lang tid før vi såg konturane av 3 poeng i bursdagspresang til dei to.
– Eg synest dette var ein veldig solid kamp av oss, og det er mykje positivt å ta med seg vidare til dei neste rundane, seier Lysekloster-trenar Ruben Hetlevik.
Fana var frampå i opningsminutta, men i 2. minutt var det corner til Lysekloster, i 7. minutt fekk dei straffe.
Lysekloster - Fana 5-0 (2-0)
Målskårarar: Truls Hovland 2 (8. og 45.), Monir Benmoussa 2 (53. og 60.) og Willy Zamble (90.).
Dagens Lysekloster-spelar: Truls Hovland
Tropp og kampfakta på fotball.no
Willy Zamble, som kom frå Brattvåg til Lysekloster i sommar, pressa på i boks då Fana lagde hands og straffe. Zamble hadde òg assist då han sprang seg frå frå ein situasjon han kunne fått frispark i, men sendte ballen til straffeskårar Hovland, som sette inn sitt andre for dagen.
Zamble viste styrke og godt humør gjennom heile kampen, anten han blei takla eller halden fast i drakta jobba han vidare med eit smil. I 90. minutt blei det mål på Zamble òg.
– Willy er ikkje berre ein god spelar, han kjem inn i gruppa med mykje god energi, seier Ruben.
Mohamad Hassan Rahmani spelte gjennom til Zamle, som kom på hjørnet av 16-meteren og sette ballen fint i nota innanfor lengste stolpe.
Men før 5-0 var ei anna nysignering frampå. Monir Benmoussa, som kom frå Florø og OBOS-ligaen, viste driblestyrke og fart. Då han fekk sjansen blei det òg to mål på rad.
Kan klatra til 3. plass
Kjetil Hansen sto sin første kamp sidan 1-2-tap for serieleiar Sotra 9. juni. Både Hansen og Thomas Hille har spelt for Fana før. Fana skapte lite, men Hansen fekk eit innlegg å strekka seg etter i 1. omgang og hadde ei dobbelredning på stillinga 2-0 i 2. omgang.
Fyllingsdalen på 2. plass vann 4-0 over Førde i dag, og held seg 3 poeng framfor Lysekloster. Serieleiar Sotra tar imot Viking 2 (4. plass) i morgon. Med siger til Sotra held Lysekloster på 3. plassen, mens avstanden til toppen aukar frå 5 til 8 poeng.
Lysekloster sin neste kamp går borte mot Vardeneset (6. plass). Vardeneset tapte i dag 0-5 for Brann 2.