Fekk festivaljobb

Os Rockeklubb viste ei ny side av seg sjølv i går, eitt av banda så bra at dei fekk ny spelejobb. Sjå video frå konserten hos Frode Art.

Kjetil Vasby Bruarøyonsdag 05. mai 2010 08:07

Tysdag kveld inviterte kunstnar Frode Sirevåg igjen til musikalsk oppleving i galleriet Frode Art i toppen av Buggegården.

Denne gong var det Os Rockeklubb som sto for underhaldninga, og banda i klubben hadde blitt utfordra til å spela så stille dei kan Det blei ikkje heilt unplugged, men det var likevel heismusikkvarianten av låtane til banda deira vi fekk høyra.

SJÅ VIDEO NEDST I ARTIKKELEN

Rockeklubb-formann Kjetil Grønvigh kalla utfordringa for «Sannhetens time».

- Det er ikkje enkelt å spela musikk som vanlegvis blir framført med eit brøl, på ein måte som gjer at ikkje øyrevoksen skvett. Det var nok fleire som, medan dei øvde til denne kvelden, tenkte at dei på ein ny måte fekk veta kor gode musikarar dei eigentleg er.

Fekk spelejobb på strak arm
Gode er dei eigentleg òg. Midtsiden.no rakk ikkje fram til å få med seg opninga med Bone Shakers, som sundag kom heim frå Brasil etter rundt fire månadar på reise, men resten av programmet fekk vi med oss.

Allakten Allstars viste stor framgang frå øvinga i musikkbingen som Midtsiden filma tidlegare i år, beatboxaren Christian Hereide Tysse (13) imponerte og veteranane i Warfart var dei som i størst grad viste det kontrastfylte med å slepa rockarar inn i eit kunstgalleri og be dei spela akustisk.

Det mest interessante innslaget i går kveld var det Abstractium som sto for. Bandet blei oppretta i haust, har spelt på juleball på skulen, julerock i rockeklubben og i Grieghalle på UKM Hordaland. I går framførte dei to eigne låtar, så bra at Andreas Lindborg frå Søfteland Rock n LoL på strak arm ba dei spela på årets festival.

- Vi hadde planar om ein turné til Tyskland, men la gå, vi stiller, spøkte trommis Daniel Hermansen, og prøvde å skjula kor glad han blei for invitasjonen.

Ung og lovande
Abstractium, som også opna musikkbingen i vinter, består av 15- og 16-åringane Mattias Wold (bass), Jan Tore Berven Sørskog (vokal/gitar), Daniel Hermansen (trommer) og Daniel Kristiansen (gitar) i Abstractium. Sander B. Johannessen er også medlem av bandet, men han var ikkje med på konserten i går.

- Det var dritfett å bli invitert til å spela på Søfteland! Vi har tre låtar som er øvd inn og to andre som ikkje sit skikkeleg, men som vi no får øva på til festivalen, seier låtskrivar og vokalist Jan Tore Berven Sørskog.

Video: Allakten Allstars, Abstractium, beatboxaren Christian Hereide Tysse og Warfart spelte så stille dei kan på kunstgalleriet Frode Art tysdag kveld. (Foto: Kjetil Vasby Bruarøy)