Fekk god hjelp av sterk ungdom

I går var det nedrigging på Osfest-området. Den store scenen på 18 x 36 meter krev mange timar med jobbing.

– Dette er same scene som blir brukt under Bergensfest. Vi går rundt 15 mann i 1,5 dag for å rigga den opp. Det krev tilsvarande innsats å rigga ned, fortel Jon Inge Keshvitalo frå leverandøren Bright.

Fire lastebilar blei fylt med metalldelar søndag ettermiddag. Dei profesjonelle riggarane frå Bright fekk god hjelp av frivillige frå festivalorganisasjonen.

– Flittig ungdom

Jan Vidar Alnes har vore teamleiar for dei frivillige som har hatt med rigging å gjera.

– Til nedrigging var det litt få som stilte, derfor måtte vi kalla inn anna mannskap. Sånn var det i fjor òg, så her må vi gjera noko, seier Alnes.

– Men før festivalen var det kjempebra oppmøte. Mange av dei eg har hatt med meg er ungdomar på rundt 17-18 år, og dei imponerte meg. Det er kjekt å sjå at det er mykje nevenyttig ungdom som veks opp i Os, seier tilflyttaren.

I alt har rundt 300 frivillige dugnadsfolk vore i sving i samband med årets Osfest.