Fekk ikkje stå i fred
Dei som såg ein benk plassert i hesteløypa trudde den var stolen. No er den det.
For ei veke sidan spurte ein Midtsiden-lesar kvifor det sto ein benk i hesteløypa. Sidan den hadde BOF (Bergen og Omland Friluftsråd) sitt merke på seg, tenkte vedkomande at banken kanskje var stolen.
Les òg: Benk på avveg
Benken var ikkje stolen. Men no er den det.
– Eg fekk melding av ein turgåar at benken er vekke, fortel Dagfinn Riple.
Den tidlegare BOF-formannen tok initiativ til å få benken plassert i hesteløypa, så turgåarar kunne få ein pust i bakken.
– Vi fekk benken av BOF og fleire sette pris på den. Det er nesten utruleg at nokon har tatt turen inn i Osmarka for å stela den, seier Riple.
Kven det er som er så desperat etter ein plass å sitja er uvisst.
Veit du kor benken har hamna? Tips oss på kjetil@midtsiden.no.