Fekk innspel til Aksdal-Bergen

Bildeserie:

1 av 8

Etter at regjeringa 20. desember i fjor fatta vedtak om trasé 4C, med bru over Bjørnafjorden, kom det prosjektbestilling til Statens vegvesen region vest for E39 Aksdal-Bergen.

Måndag hadde Statens vegvesen oppstartmøte i Os, i møterommet Kobbavågen (!) i Oseana, der dei orienterte om oppgåvene som no venta, og der Fylkesmannen, Hordaland fylkeskommune, Kystverket, Forsvaret og ordførarane i dei seks komunane vegen skal gjennom; Tysvær, Sveio, Stord, Fitjar, Tysnes og Os.

Frå Os kommune stilte ordførar Terje Søviknes (Frp), for å snakka Os si sak. Som tilhøyrar var også leiar for samferdsleutvalet i Hordaland og kommunestyremedlem Gustav Bahus (Frp), varaordførar Marie Lunde Bruarøy (H), kommunestyremedlem Lars Atle Skorpen (Ap) og Aina Tjosås leiar for plan og utvikling i administrasjonen i Os kommune.

Ikkje berre Os som har synspunkt

Og det er ikkje berre i Os vi har ønske eller uvisse om traséval.

I går kom det fram at Tysvær vil ha trafikken utanom sentrum, Sveio vil ha vegen vekk frå folketette område, Stord vil ha byggestart i 2018, Fitjar håper på kryssing av Langenuen lengst mogleg nord på Stord, Tysnes lurer på korleis dei skal driva planarbeid i kommunen fram til dei veit kvar vegen skal gå og Os vil ha brulanding på Halhjem.

Alle var opptatt av tett, open og ærleg dialog mellom regjeringa, vegvesenet, kommunane - og ut til innbyggarane. Fleire var også interessert i påkopling av nabokommunar som Austevoll, Kvinnherad og Fusa, sjølv om det ikkje ligg inne i bestillinga vegvesenet sit på.

Men før ordførarane sleppte til var det vegvesenet som orienterte.

– I NTP i 2017

Regionvegsjef Helge Eidsnes og prosjektleiar Signe Eikenes fortalte om oppdraget, om kva som er gjort til no og kva som er neste mål.

– Vi er nok litt tidleg ute med denne type samling, men vi er opptatt av å ta med kommunar, fylkeskommune, andre einingar og fagfelt, så tidleg som mogleg i prosessen, sa Helge Eidsnes.

Dei siste fire åra har det vore avgjerd om, og gjennomføring av, KVU (konsekvensutgreiing), KS1 (kvalitetssikring 1), tilleggsutgreiing – og avgjerd om statleg plan.

– Dette å jobba med statleg plan er ganske nytt for oss. Både vi og regjeringa har nokre rundar å gå før det er klart korleis vi skal jobba saman, og korleis departementa skal jobba vidare med dette, kva departement som skal få kva rolle, sa Eidsnes.

Vegvesenet konsentrerer seg om Os og sørover, då det ligg ferske reguleringsplanar for Os-Bergen i Svegatjørn-Rådal-prosjektet. Grensa i sør er vegvesenet ikkje like sikre på.

– Rogfast dekker opp til Bokn. Vi vil undersøka om det også er grunnlag eller behov for å ta Bokn-Aksdal med i det vidare arbeidet.

Målet er å vera ferdig med planprogrammet til 2016 så denne kan koma inn i Nasjonal transportplan (NTP) i 2017.

Tysvær: Ordførar Harald Stakkestad (H)

Stakkestad var veldig klar for at Bokn-Aksdal skulle med i det vidare arbeidet.

– Vi må også hugsa på at Rogfast er ferdig før Aksdal-Bergen, og trafikken i Aksdal og resten av Tysvær kjem til å auka, både på E39 og E134.

Det er i Aksdal dei to europavegane, E39 langs kysten og E134 frå Hardanger til Haugesund, møter kvarandre.

– Vi håper også å få leia hovudvegen ltt utanom sentrum, og vi jobbar med eit nytt næringsareal som kan justerast og ta omsyn til ny E39. Derfor hadde det vore greit å få ei tidleg avklaring på kvar vegen skal gå.

Sveio: Ordførar Ruth Eriksen (H)

Eriksen fortalte om dagens E39 gjennom Sveio, om farlege kryss og folketette område.

– Eg reknar med at det blir tatt omsyn til kvar folk bur, det er ikkje alle plassar i Sveio at det passar med firefelts veg. Eg reknar heller ikkje med at de vil ha 60-sone på ny E39.

– Vi har også nokre farlege kryss eg reknar med forsvinn, og enkelte andre gamle synder.

Helge Eidsnes svarte etterpå at det ikkje er vedtatt firefeltsveg på heile strekket, men at det i planarbeidet skal leggast til rette for bygging av fire felt, eller seinare utviding til fire felt. Han stadfesta også at 60-sone ikkje var aktuelt.

– Vi har i Noreg den lågaste terskelen for bygging av fire felt. Andre land opererer med 16.000 bilar, vi med 12.000.

Stord: Ordførar Liv Kari Eskeland (H)

Eskeland sa at stordingane var mest opptatt av Stord-Os, å bli ferjefri snarast mogleg er viktigast.

– Vi vil ha spaden i jorda i 2018, vi vil ha parallelle prosessar på fylkesvegar inn til ny E39, så desse står klare, og vi vil ha rask avklaring på sårbare artar og område, så ikkje det dukkar opp show-stopparar i siste liten.

– Bruk kjent teknologi. Vi har fleire gode teknologiske verksemder i Sunnhordland - bruk dei!

– Vi vil lytta til det som kjem fram i statleg plan, men der det er like vilkår, som pris, vil vi at lokale behov skal bli førande.

– De kan også gløyma dette med 200-årsperspektiv, til no er det berre grunnlova som har vart i 200 år. Tenk 50 til 100 år fram, vi klarer ikkje sjå lengre fram enn det.

Fitjar: Ordførar Wenche Tislevoll (H)

Tislevoll var mest opptatt av kvar Langenuen skal kryssast.

Går ny E39 over til Tysnes frå sørenden av Stord får folk på Fitjar 22 minutt lengre reise til Bårdsund i Tysnes kommune enn om det kjem bru frå nordre del av Stord over Langenuen.

Avstanden Fitjar - Bårdsund varierer frå 11,6 til 41,3 kilometer i dei to alternativa.

– Med bru nord i Langenuen får Tysnes færre kilometer med E39 på eiga øy, men eg reknar med at dei vil spara den solvendte vestsida si for ein firefelts motorveg.

– Stord har E39 på austsida, på skyggesida, der det likevel ikkje er attraktivt å laga bustadområde.

Tysnes: Kjetil Hestad (Ap)

Hestad starta med å skryta av Oseana, der møtet blei heldt, og av vegvesenet, som inviterte til møtet og vil laga ei referansegruppe som deltar i prosessen.

Han var ikkje like opptatt av byggestart og årstal som ordføraren på Stord.

– Om det blir 2018 eller 2021 betyr ikkje så mykje. Vi er utålmodige vi òg, men det viktigaste er at det blir ein god prosess.

– Vi er glade for at det blei bestemt statleg plan, men vi kunne godt tenkja oss å få tidleg avgjerd om traséval gjennom Tysnes.

– Vi vil også ha svar på korleis vi skal driva planarbeid framover. Vil staten bandlegga eit større område for å opna for fleire alternativ?

Os: Terje Søviknes (Frp)

Søviknes brukte taletida si på å gå gjennom vedtaket til innspel fatta i kommunestyret i Os 5. februar 2013.

– Vi kan ikkje akseptera ilandføring i Øyane, vi vil ha landing av brua på Halhjem og vegen i tunnel vidare til Lekven eller Moberg.

– Vi er også opptatt av tverrsamband til Austevoll og Fusa, og grunna kraftg vekst i Os ønskjer vi naturlegvis ei rask avklaring på traséval gjennom kommunen vår, for vidare planarbeid.

Søviknes fortalte også om den tverrpolitiske arbeidsgruppa i Os, der alle parti utanom Venstre er med.

– Os vil vera ein tydeleg premissleverandør til vegvesenet og regjeringa, vi vil sitja framoverlent på kanten av stolen medan planane blir forma.

Ny geografi på Vestlandet

Seinare i møtet, då fylkesdirektør samferdsle i Hordaland fylkeskommune, Håkon Rasmussen, hadde ordet, kom han med fleire element han meiner vegvesenet bør ha med i den vidare prosessen.

– Vi kjem no til å teikna om geografien på store delar av Vestlandet. Langsiktig konsekvens, frå lokal arealbruk til senterstruktur, korleis dei ulike lokalsamfunna vil bruka den nye vegen, og korleis dei vil endra seg etter at den kjem, kan vi nok knapt ana.

– Planprogrammet blir veldig viktig, de kjem til å zooma inn og ut av kartet for å ta både lokale og regionale omsyn. Det blir goder og ulemper frå stad til stad.

Gode referansar

Eidsnes takka ordførarane for innspela og det blei litt diskusjon om kven som skulle vera med i ressursgruppa vidare.

Det kom forslag om å kopla inn nabokommunar, slik det ville vore aktuelt for om det ikkje var statleg plan, sidan naboar er part i saka.

Ingen av ordførarane var interesserte i at ressursgruppa skulle bli så stor, men fleire var opne for at det, i enkelte møte, kunne vera orientering til nabokommunar, som Bergen og Haugesund, men også andre med kort reise til E39.

Men Søviknes ville ha éin eller to ekstra representantar frå kvar kommune, frå politisk opposisjon, ikkje berre ordførar.

– Det er lettare å vera to og det er betre når vi skal vidareformidla til resten av det politiske miljøet i heimkommunen, at ikkje det berre er ordførar som har snakka kommunen si sak.

Fjordkryssing, Forsvaret og sjeldne artar

Geir Skorstad frå Sjøforsvaret fortalte om bruk og kompromiss av Bjørnafjorden og Knut Stenevik frå Kystverket fortalte om korleis brua må formast for å opna for cruiseskip og plattformer.

Assisterande fylkesmann Rune Fjeld fortalte om sjeldne artar i Bårdsund og på Lepsøy og Mathias Eidem i vegvesenet, som har ansvar for sjølve kryssinga av Bjørnafjorden, fortalte om bru-alternativa.

Midtsiden kjem tilbake med eigne saker om kva desse hadde å fortelja.