Fekk melding om fleire personar på isen

Fredag formiddag målte Bjørnafjorden brann og redning isen på Banktjørn til 13 cm.

Skiltet med utrygg is blei hengande, 2 cm mangla før isen kunne kallast farbar.

Fredag i 16-tida fekk politiet melding om fleire personar på isen.

– Då vi kom til staden var det tre ungdomar ved vatnet. Dei hadde sjølv målt at isen var for tynn og gått av vatnet, opplyser politiet.

Fredag var det blank stålis på vatnet, frå laurdag til måndag er det meldt rett over null og nedbør. Isen kan likevel bli tjukkare og farbar i løpet av veka, det er meldt minusgradar igjen frå tysdag.

Fredag ba brannsjefen folk om å visa tolmod.

– Folk ringer og sender melding både seint og tidleg. Mange lengtar etter å gå på skøyter, og det forstår eg, eg er glad i å stå på skøyter sjølv, sa brannsjef Eivind Hovden.