– Fekk oss ein god latter

Tysdag kveld skjedde det som «måtte» skje etter at Os kommune fekk installert undervasskamera på ein av stolpane til Os brua. Noko heilt anna enn fisk dukka opp på «kveldens sending».

– Medan vi ventar på den kommande fiskesesongen satt eg og sambuaren og såg på undervasskameraet ved Os bruo, fortel ei fiskeinteressert kvinne til Midtsiden.

Med shortsen på knea

Og paret fekk seg ei overrasking og ein god latter.

– Plutseleg kom det eit plask. Noko kom tydeleg frå brua og ned i vatnet. På tull så seier eg «tenk om det dukkar opp noko på skjermen no», og det gjorde det. Der dukka det opp ein person med badeshortsen på knea. Du kan tru vi fekk oss ein god latter, fortel ho.

«Laksen» var ikkje synleg, men blank messing var det likevel å sjå.

– Han hadde seg ein dukkert etterpå også. Vi vil tru at det er ein som ikkje har fått med seg at det er kamera der, eller ikkje tenkte over det. Morosamt var det uansett.

Frå ei anna kjelde har Midtsiden fått tilsendt eit opptak av seansen, som nok var meir planlagt enn den fiskeinteresserte kvinna var klar over.