Fekk pengar
Onsdag blei ein jubeldag både for Switch skatepark og Os Turlag sitt klatreveggprosjekt då dei fekk telefon frå Trygve Amundsen i DNB.
Trygve Amundsen ringte denne gongen på vegne av Sparebankstiftelsen DNB NOR for å fortelje gladnyheten om at dei fekk midlar frå stiftinga si vårutdeling.
- Det er kjekt å kunne få lov til å ta slike telefon dagen før nasjonaldagen, smila banksjefen.
Berre å setta i gang
Då hadde han nettopp fått brev frå stiftinga om at to av prosjekta som hadde søkt fekk midlar. Switch skatepark får 50.000 kroner og klatreveggen Os Turlag planlegg i Nore Neset Aktivitetshus 97.000 kroner.
- Vi manglar 80.000 kroner, kan nokon hjelpa? lurte leiar Linda Lohne i Os Turlag på i Midtsiden 3. mai.
No er pengane på plass og det er berre å bestilla klatreveggen.
Lys og straum
Bjørn Madsen i Switch skatepark er over seg av glede når han får meldinga frå Trygve Amundsen.
- No blir det både lys og straum, jublar Madsen som lovar ei heidundrande opning av skateparken litt seinare på våren.
Nærmiljø, idrett og leik prioritert
Sparebankstiftinga DnB NOR deler ut 25% av utbytte dei får som største eigar i DnB-konsernet til almennyttige formål. Utdelinga er to gangar i året.
Prioriterte formål i 2012 er Kunst og kultur og Nærmiljø, idrett og leik.
Neste søknadsfrist er 15. september.