Fem av Fredrik
Eit ungt juniorlag sikra framleis eliteplass då dei tysdag banka Vadmyra 9-0.
Etter tap i dei to siste kampane var det eit revansjelysten juniorlag som møtte Vadmyra på Kuventræ tysdag kveld. Med heile 5 gutespelarar frå start var dei i tillegg eit rekordungt lag.
Alder spelar ingen rolle når det kjem til fotball. Osjuniorane rundtspelte Vadmyra i 2 x 45 minutt og kunne gå av banen med ein fortjent 9-0 siger.
- Vadmyra hang greit med i første omgangen, men det var berre ein god Vadmyra-keeper som hindra oss i leie meir enn 2-0 til pause, fortel Ostrenar Leif Gunnar Borgen.
Fire mål på ein omgong
I andre omgangen flytta Os gutespelaren Fredrik Heggland fram som spiss. Eit trekk som viste seg å væra vellykka. Fredrik putta ballen i mål heile fire gongar i løpet av omgangen i tillegg til det eine han satt inn før pause.
- Heile laget gjer ein god kamp, men det er klart at det er litt spesielt at ein spelar skårer fem av måla våra, seier Borgen.
- Vi spelar ein godt gjennomført kamp med mykje god fotball. Samstundes stiller Vadmyra eit svakt mannskap utan innbyttarar, fortel Borgen som legg til at det ikkje tek frå juniorane den gode prestasjonen dei gjorde på banen.
Sikra eliteplassen - vil slå Sotra
Med sigeren over Vadmyra sikra juniorane plassen i elitepulja også neste år. Men sjølv om plassen er sikra har dei mykje å kjempe for.
- Vi har att to kampar. Mot Fyllingen borte, før vi avsluttar mot Sotra heime den 19. oktober.
- Sotra kjempar om kretsmeisterskapet saman med Fana og Løv-Ham. Vi har slått dei 5-1 og tapt mot dei 1-6 tidlegare i sesongen så lysta til å avslutta med tre poeng mot dei heime er stor, avsluttar Leif Gunnar Borgen.
Os sitt lag:
Frode Øvredal, Stian Bakke, Børge Borgen 1, Jan Ole Johannessen, Håvard Grøteide, Joakim Bjørnevik, Johannes Jordal 1, Simen Lassen, Fredrik Heggland 5, Sven Lyssand, Tor Erik Berge 1.
Innbyttarar med speletid: Fredrik Sælen, Fredrik Nilsen 1, Ørjan Glesnes (gutespelar som debuterte på juniorlaget).