Ferska ungdomsgjeng

Den siste tida har ein ungdomsgjeng halde seg ved butikken i Søre Øyane etter stenging. Måndag kveld blei dei tatt på fersken under innbrot.

Kjetil Vasby Bruarøytirsdag 27. okt. 2009 09:07

- Vi har vore på vakt ei stund, seier innehavar av Bunnpris Vedholmen Landhandel, Inglaug Brimsholm.

Ein gjeng med ungdomar, nokre frå andre krinsar og nokre frå lokalsamfunnet i Øyane, har den siste tida heldt seg utanfor butikken etter stenging.

- Sundag hadde det vore folk inne på lageret vårt, i går fekk eg melding frå ein nabo om at det var aktivitet rundt butikken igjen, seier Inglaug.

Heldt vakt
Då Brimsholm kom kjørande såg ho først ungdomen som sto vakt. Vel framme på butikken sto to andre ved inngangen til lageret og ei dør som var opna.

- Dei hadde plassert ei pute framfor overvakingskameraet, akkurat slik det var på sundag. Utan at eg nemnde sundagen sa dei "det var ikkje vi som var her i går", så dei har i alle fall kjennskap til to innbrot.

På dette lageret er det berre brus og olje, noko innehavaren av butikken trur ungdomane kjenner til.

- Pass på ungane
Ungdomane hadde kome på moped. Medan Inglaug var på butikken kom ein annan ungdom i bil, som kjenner dei tre som blei tatt, men som ikkje skal ha hatt med saka å gjera.

- Ungane er frå 18 år og nedover i alder. Eg trur nokon burde ha passa betre på ungane sine, og sjekka betre kven dei var med om kveldane, seier butikkeigaren.

Tatt av politiet
Førre måndag var det mykje politi på Vedholmen, då for å leita etter biltjuven som stakk frå Strøno i båt.

- Eg fortalte om ungdomsgjengen eg hadde rundt butikken, og dei s det var berre å ringa om det var noko.

Og det gjorde Inglaug. Politiet rykte tysdag kveld ut til Vedholmen Landhandel for å ta hand om dei fire.