Festivalopning i sentrum

Osøren Blues & Jazzfestival har både ny artist og anna gledeleg nytt å by på.

Kjetil Vasby Bruarøytirsdag 18. mai 2010 19:05

Årets Osøren Blues & Jazzfestival reduserer talet på scenar, men aukar talet på artistar og konsertar.

- I år kjem 20 band og over 8o musikarar til å spela under festivalen, seier festivalsjef Gunnar Nagell Dahl.

I år blir det ikkje scene utanfor Peppes, eller i Oselvarnaustet.

- På Peppes har det av og til verka litt ulogisk på spisegjestar å etter eit visst klokkeslett løysa billett. Dessutan har scenen ved Peppes konkurrert litt med opplegg i Vognhallen, så vi prøver no å samla det meir.

Godt nytt
Rett før helga blei det klart at det blir opning av festivalen med gratiskonsert i Os sentrum på dagtid, og at Fredrik Strand Halland kjem for å spela i Vognhallen før CC Cowboys skal på scenen.

- CC Cowboys bruker litt tid til lydprøve i Vognhallen fredag, men vi klarar heldigvis å få inn eit band før cowboyane og Eric «Slim» Zahl & South West swingers skal på scenen.

- Så vi er veldig glade for at Fredrik Srand Halland kunne koma med band. Den unge musikaren har imponert mange, ikkje minst dei som fekk med seg konserten han hadde i Os førre gong han var på programmet under festivalen vår, seier Nagell Dahl nøgd

Nagell Dahl er også glad for at det også i år blir opning med konsert i sentrum på dagtid før opningsfesten held fram i Visningssenteret.

- Vi vil også ha eit meir utvida program i tid, det blir konsertar, jam og matiné nesten døgnet rundt.

Cowboyar, blues og jazz
At CC Cowboys, som er venta å bli eit viktig trekkplaster til festivalen, ikkje er eit blues- eller jazzband, meiner Nagell Dahl er heilt OK.

- Vi er ikkje åleine som blues- og jazzfestival i det å invitera band frå andre sjangrar, men hadde nokre rundar internt i styret før vi bestemte oss for å booka CC Cowboys.

- Vognhallen er glimrande til slike store konsertar, og med spissa program på resten av festivalen meiner vi det passar godt med ei kjent gruppe med så stort nedslagsfelt som cowboyane frå Fredrikstad.

Dei største opplevingane
Festivalsjefen seier at styret er nøgd med samansetjinga av årets program, og når vi ber han peika på det han trur blir dei største opplevingane denne junihelga, går han etterkvart gjennom heile lista.

- Vi var i si tid ein av dei første festivalane som booka Britt Synnøve Johansen, som i år kjem tilbake til Os for å spela i Visningssenteret om laurdagen. Ho syng fantastisk bra, dette blir eit av høgdepunkta, seier Gunnar, og legg til:

- Marius Neset kjem jo tilbake til heimbygda rett etter avgangskonserten i København, og så har vi Omar & The Howler´s frå Texas, som blir ein stor konsert laurdag kveld.

Før Omar går på scenen skal andre amerikanarar ta mikrofonen. Angela Brown & the Mighty 45`s, som skal spela årets kyrkjekonsert om sundagen, tar også nokre låtar i Vognhallen.

Bra sal
I fjor hadde Osøren rekord i billettsalet. Salet av Vamp-billettane starta tidleg i 2009, i år har salet av billettane til alle konsertane starta tidleg.

- Det ser ut til å fungera bra, vi har hatt ein overraskande god start på billettsalet. Minst eitt av cruisa er utselt hos Billettservice, og laurdagen har faktisk til no selt betre enn fredagen.

Festivalsjefen har ikkje full oversikt, men så skal det også noko til at det blir fullt.

- Cruisa blir nok utselt som vanleg. Dei to andre scenane tar 400 (Visningssenteret) og cirka 1700 (Vognhallen). Så vi har framleis meir å selja på, seier Gunnar Nagell Dahl.

Årets festival går frå 25. til 27. juni.