Filma Ian i Gudvangen

– Eg har nett oppdaga ein app som gjev deg raskt internett over heile verda, der du kan bestilla hotell, restuarant og sjekka ferjeruter, seier Ian Wright, kjent frå Lonely Planet, i ein fersk reklamefilm for den norske nettlesaren Opera Mini.

Så mister han cruisebåten.

SJÅ VIDEOEN NEDST I ARTIKKELEN

– Vi fekk jobben på epost og stilte på kort varsel i Gudvangen, seier Anders Fløysand frå Varde Film og Media.

Han reiste saman med kollega Vegard Strønen på oppdrag med mannskap og utstyr for å filma den kjente britiske programleiaren då han sprang etter båten han ikkje rakk.

Omsverma

På plass i Gudvangen inst i Nærøyfjorden var Varde raske med å rigga kran og anna utstyr. Så kom Ian og turistane i Gudvangen flokka seg rundt han.

– Han verka som ein veldig omgjengeleg fyr, tok seg god tid til å ta bilde saman med turistane, prata reise og skriva autografar.

Filmcrewet skulle uansett venta på at båten skulle gå, så dei hadde god tid.

– Vi merka fort at han har vore nesten over alt, han har nok besøkt fleire turistattraksjonar i Noreg enn dei fleste nordmenn.

Fleire oppdrag

Så filma Ian seg sjølv med mobiltelefonen før han sprang etter båten som hadde gått og Varde skaut ein sekvens.

– Vi hadde 4-5 løft med kranen, så vi hadde båten på ulike avstandar, så var det over.

Men Varde, som blant anna har laga musikkvideo for Immortal og vore med på produksjonen av Madcon i reklamefilm for Bremangerlandet (ein video som førebels ikkje er lansert), har vore i sving for Opera Software fleire gongar.

Les òg: Varde med på Madcon-sirkuset

– Eg kan ikkje røpa meir enn at dette ikkje er einaste oppdrag, seier Fløysand.

Verdas femte største

Opera Software blei etablert i Oslo i 1995 og børsnotert i 2004. Opera er verdas femte mest brukte nettlesar.

– Reklamefilmen skal nok visast over store delar av verda og blir med det den mest sette produksjonen vår til no, seier Anders Fløysand frå Varde Film og Media.