- Fint å vera ein Longshot

- Vi blei utruleg glade då vi blei nominert til Spellemannsprisen. Å sitja to meter frå scenekanten og bli ropt opp som vinnarar var heilt surrealistisk, seier Ine Tumyr frå ORBO & The Longshots.

Sidan ho og Ole flytta til Os har dei blitt godt mottatt. Under prisutdelinga var det fleire osingar i salen, nokre av dei storma til og med fram med blomar då dei vann.

- Å få møta alle i Fjellheim no på laurdag var stort, vi fekk mange fine tilbakemeldingar, og salen var stappfull.

Rundt 350 fekk med seg gratiskonserten.

- Korleis er det å ha Ole som frontfigur, låtskrivar og leiar for bandet?

- Ole lyttar til alle, men har sjølvsagt siste ordet. Vi er ein gjeng med venar som jobbar fint i lag, og Ole gjer ein god jobb som frontfigur, meiner Ine.

ORBO sjølv opplevde Fjellheim-konserten som ei flott feiring av Spellemannsprisen.

- Etter konserten var det platesignering, og fleire som ville ta bilde saman med sjølve prisen. Mange fortalte at dei hadde høyrt om oss før, men først no blitt skikkeleg kjent med oss. Det blei nok nokre nye fans av konserten, trur Ole.

Ei positiv overrasking for både Ole og publikum blei det at Kurt Nilsen ville vera med på festen.

- Vi har hatt ein del kontakt i det siste, og blant anna spelt saman på Madam Felle i jula. Han ringte laurdag og sa han ville vera med på festen, og då han kom fram ville han også gjera ein låt saman med oss.

Kurt og Ole song Tom Petty-låta "Mary Jane's Last Dance" saman.