– Fjorden er full av kval

Søndag formiddag var Erik Nilsen og ein kamerat, med ungar, på veg frå Os til Austevoll for å setja teiner.

Utanfor Halhjem møtte dei ein stor flokk med kval.

– Først trudde vi det var niser, men så såg vi at det var større dyr, fortel Erik.

• Sjå òg: Filma spekkhoggarar utanfor Kobbavågen (mars 2017)

Både dei vaksne og ungane fekk eit tettare møte med kval enn dei nokosinne har hatt før.

– Det var to flokkar, sikkert rundt 30 dyr til saman. Det var ei flott oppleving, synest Erik om det som truleg var møte med vågekval.

Fleire observasjonar fredag og laurdag

Laurdag formiddag fekk Midtsiden tips om at ein flokk på rundt 50 kval, «truleg grindkval», ifølgje tipsar, var på veg frå Tysnes og nord mot Øyane.

Midtsiden var på fjorden i to omgangar for å leita etter dyra mellom Strøno og Reksteren, men utan fangst.

I løpet av dagen snakka vi med folk som hadde sett spekkhoggar utanfor Halhjem fredag, og som såg vågekval utanfor Ervikane laurdag ettermiddag.

Ei veke med sol og kvalsafari

Det er meldt opphaldsvêr og lite vind ut dagen, sol og 21 gradar måndag og lettskya til og med neste helg.

Det er med andre ord duka for ei god veke med kvalsafari i Bjørnafjorden, så sant dyra held seg her.

Har du tips, foto eller video?

Send oss ei melding om du vil dela med Midtsiden sine lesarar!

tips@midtsiden.no - 97975200