Fleire ting er uklart etter ulykka på Lepsøyvegen

Laurdag i 11-tida rykte politi, brannvesen, ambulanse og lege ut på melding om bil i murkant ved Hagavik Hjemmebakeri.

Ein bil på veg frå Skeisflaten køyrde, ifølgje bremsespor på staden, på feil side av refuga i krysset med Lepsøyvegen, og stoppa i murkanten som går langs fortauet forbi butikken og bakeriet.

– Bilførar og éin passasjer, begge er menn i starten på 20-åra, stakk frå staden. Ein kvinneleg passasjer, også ho i starten på 20-åra, var igjen på staden, fortel politioverbetjent Anne Lyssand.

Hundepatrulje blei kopla inn, men først etter rundt fire timar med etterforsking blei han som er mistenkt for å ha køyrd bilen funnen. Han blei funnen på eiga heimeadresse og blei tatt med for utvida blodprøvetaking.

– Bileigar seier at bilen var stolen. Den var ikkje meldt stolen i forkant, og vi har fått ulike forklaringar frå ulike folk vi har snakka med i løpet av denne laurdagen. Det er foreløpig noko uklart både kven som køyrde og kven som var passasjer, men vi etterforskar saka vidare.

Begge dei to som er mistenkte for å ha stukke frå staden har førarkort. Ein av dei to skal ha blitt skadd i møtet med muren.

Den kvinnelege passasjeren skal ha forklart at ho ikkje kjente dei ho sat på med, men at ho fekk haik frå Esso.