Føler seg forfølgt
Etter eit bensinavstikk på Er-An, med ein bil med stolne skilt, blei politiet sendt etter ein bil som liknar syndaren. Men også andre har vore etter han dei meinte var syndaren.
To dagar på rad i slutten av april var det to bilar som stakk frå Er-An på Røykenes utan å betala for bensinen som var fylt.
Begge bilane hadde stolne skilt, ein av dei hadde skilt som var tatt frå ein lastebil.
Nokre dagar seinare såg innehavar Erling Andersen ein bil som likna den eine av dei, ein eldre volvo med eit spesielt klistremerke på.
– Eg kontakta politiet, som la seg etter han og fekk stoppa bilen, fortel Erling.
Lastebilførar tok saken
Mannen som blei stoppa står i dag fram med namn og bilde, også av bilen, på bt.no.
Ifølgje føraren la politiet saken død då dei høyrte hans forklaring. Til BT fortel han at føraren av lastebilen som fekk fråstole skilta sine har følgt opp saka.
– Han hadde kontakta sjefen min og fortalt at eg hadde stole bensin. Eg kontakta vedkomande og forklarte at eg ikkje hadde gjort det, men han trudde meg ikkje.
Lastebilføraren kjem ikkje med annan kommentar til BT enn at "saka er avslutta".
Viste video
Mannen som blei stoppa reagerer på at tilsette ved ein bensinstasjon på Varden, som også var utsett for bensinavstikk av ein liknande volvo, hadde vist video frå overvakinga til ein utanforståande, truleg lastebilføraren.
Dagleg leiar ved stasjonen innrømmer rutinesvikt og ber om orsak.
– Stort og dyrt problem
Erling Andersen hos Er-An angrar ikkje på at han sendte politiet etter mannen.
– Eg har sjekka med Volvo og det er svært få bilar i Noreg av den modellen som har same klistremerke, så då eg såg bilen igjen, med ein mann som likna han på bildet, følte eg at det var rett å ringa politiet.
– Avstikk er eit stort og dyrt problem, om nokon stikk frå ei rekning på 1000 kroner må eg selja for 20.000 for å dekka tapet inn igjen.
– Kvart år blir det hos oss tappa for rundt 10.000 kroner som det ikkje blir betalt for, fortel Erling Andersen.