Folkefesten
Bildeserie:
Fleire skular og barnehager lot undervisning vera undervisning og tok heller turen til Osøyro onsdag førmiddag for å få med seg opptakten til starten på Tour des Fjords.
– Vi ligg litt etter skjema no, fortalde ordførar Terje Søviknes nokre minutt før klokka 11 i førmiddag.
Internasjonal lydmann
Scenen kor alt skulle konsentrera seg rundt kom nemleg litt seint inn til Øyro, men berre ti minutt seinare opna skulekorpset festen før Eirik Søfteland med band tok over scenen.
– Vi fekk ei utfordring med lydmann, men heldigvis var Paul Inge Vikingstad heime og sa ja på strak arm. I dag skal det i allefall ikkje stå på lyden, fortalde riggesjef Kjetil Osablod Grønvigh medan Eirik Søfteland sto på scenen.
Vikingstad er nemleg fast lydmann for Aurora Aksnes og med på hennar ferd rundt i verda.
Fekk hjelp av Kuhnle
Søfteland var, nær sagt sjølvsagt utfordra til å ta nokre sykkelsonger.
– Ta godt imot våre vener frå dagsenteret på Kuhnle, introduserte Eirik før Queens Bicycle Race med Kuhnlegjengen på ringeklokker, og med det blei barnerittet tråkka i gang.
Heftig BMX-show
Etter at dei 93 yngre syklistane var ferdige med sine runder i Os sentrum var det klart for noregstoppen i BMX-sykling som showa med halsbrekkande stunts på ei spesialbygd rampe.
– Vi er ein gjeng BMX-syklistar som reiser rundt med showet, når vi ikkje er ute i verda og konkurrerer. No skal de få sjå noko de nok ikkje har sett på Os før, fortalde Didrik Dimmen, grunnleggjar av BMXShow.no.
Og Dimmen heldt ord. Saman med resten av crewet blei det både forlengs og baklengse saltoar med ulike twitar og skruar.
Sjå opptak av showet og dei andre innslaga på Midtsiden si facebookside.