Divaldo Cardoso i duell mot Varegg i fjor. (Foto: Kjetil Vasby Bruarøy)

Første treningskamp på heimebane

Os tar imot Varegg og avtroppa Os-trenar Ørjan Håland på Kuventræ onsdag.

Av: Kjetil Vasby Bruarøy

Ei veke før sesongopning (borte mot Stord, kvalik til NM) tar Os imot Varegg i det som blir vinterens siste treningskamp - og den første på heimebane.

Os har slite med å slå Varegg tidlegare, i fjor blei det tap både borte (2-1) og heime (0-2). Varegg landa på 6. plass, mot 3. plass året før, Os rykte ned, mot 4. plass i 2016.

Os stiller redusert. Varegg, som blir leia av tidlegare Os-spelar og Os-assistent Ørjan Håland, mista mange spelarar før jul, men stiller ganske sterkt.

Fleire skadar etter ein god vinter

Karl Kvile fortel at han må klara seg utan blant andre Mats Cato Moldskred, Christoffer Hafsås, Frode Storebø, Marius Mikkelsen og Alexander Dale. I tillegg er Sander Kvittingen usikker.

– Vi har heldigvis hatt ein nærmast skadefri treningsvinter, men no har vi fleire som er sjuke eller skadde. Hafsås er vekke i tre veker, det same er Storebø. Mikkelsen er sjuk og Moldskred er vekke. Det same er Tøssebro.

Målet er likevel å prøva å skapa eit kampbilde som skal likna på det Os ser for seg at serien skal handla om i år; Os skal ha styringa.

– Eg har ikkje fokus på dei som har eit skadeopphald, men på dei som speler. Dette er eit ypperleg høve for dei som speler til å visa seg fram.

Stiller ungt og sterkt

Håland fortel at Varegg mista fem av dei mest etablerte spelarane etter serieslutt i fjor, éin til Florø og resten til Fyllingsdalen.

– Mykje av vinteren har gått med til å bygga opp stallen. Vi har fått ein fin gjeng, men det er òg ein ung stall, dei fleste er 19-21 år.

– Vi har spelt sju treningskampar i vinter, ikkje to av dei med same startellevar. Mange har vore sjuke, men no har dei fleste kome tilbake og eg gler meg både til treningskampen og til resten av innspurten før seriestart.

– Korleis blir det å leia laget frå borte-benken på Kuventræ?

– Det blir rart, men det blir kjekt å kunna spasera til treningskamp igjen. Det blir òg kjekt å møta spelarane, men i denne kampen er eg utelukkande opptatt av å sjå korleis vi løyser oppgåva. Dette er øving. Men eg gler meg til å sjå Os frå tribunen i år. Dei har ein god stall og eg trur dei kjem til å få ein kjempesesong!

Kampen onsdag startar klokka 19.00.