Frå USA til ompa-ompa

I sommar var det cowboyfest med kapp-eting, i fjor haust arrangerte den USA-inspirerte Er-An Veikro både drive-in-kino og talentkonkurransen Up & Coming.

– Vi opplever enorm vekst, 55 prosent til no i september og totalt rundt 60 prosent til no i år, seier Linda Andersen.

Hovudinntekta er restaurantdrifta, men trass dei travle dagane tar Linda og dottera Hanne Catrine seg tid til å arrangera ein liten serie med konsertar og andre kulturinnslag også denne hausten.

Først ut: Vetrhus

Allereie neste helg startar kulturprogrammet i restauranten på Røykenes.

– Vetrhus Bluesband frå Odda har i ei årrekkje vore mange osingar sitt favorittband. No er det nokre år sidan sist dei var i bygda, under Osøren Blues & Jazzfestival, og mange har spurd etter dei.

Laurdag om ei knapp veke speler dei på kroa til Inda og Hanne Catrine.

– Helge Tverdal og resten av bandet glerseg veldig til å koma til Os igjen og billettsalet er godt i gang. Vi har berre plass til 100, så dette blir ein skikkeleg intimkonsert, seier Linda.

Tre dagar med drive-in

Drive-in-kino blei ein stor suksess på Røykenes i fjor. Men Andersen ønskjer å koma med ei presisering før årets kinodagar.

– Vi har ein eigen dag berre for amcars, men begge dei to andre dagane er opne for alle, anten du kjører asiatisk, tysk eller elbil.

Filmprogrammet vil ho førebels ikkje røpa, men det er bestemt at det blir kino to gongar for dagen tre dagar på rad, frå tysdag til torsdag i haustferien.

Filmane blir også vist inne på kroa, for dei som ikkje vil sitja i bil. I eit eige, stort telt bak kroa skal det vera bilutstilling desse dagane.

Lager oktoberfest

Helga etter haustferien, laurdag 18. oktober, viker Er-An frå amerika-konseptet og kjører inn noko fullblods tysk i underhaldningsutvalet.

– Andreas Lindborg frå LOL var veldig gira på å laga oktoberfest og eg ser at han kjem til å ta 'an heeeeilt ut, seier Linda.

Til festen kjem Er-An til å tredobla kapasiteten med stort partytelt bak kroa. På scenen står eit 11 mann stort orkester denne kvelden.

– Vi har hyra inn Midtun Pavillion orkester, og dei speler visst sånn at du må halda på både hatten og det som elles måtte vera laust.

– Dei stiller fullt uniformert og det håper vi publikum også gjer denne kvelden, seier Linda.