Frisk feiring på Ekeberg

Bildeserie:

1 av 19

I går blei siste kamp i innleiande rundar spelt, og 4 av 7 lag frå Os tok poeng.

Det sendte desse laga til A-sluttspel: Os G19-1, Os G16-1, Os G15 og Nore Neset/Os J15-1.

Alle dei tre andrelaga, G19, G16 og J15, hamna i B-sluttspelet. Sjå detaljar nedst i artikkelen.

Mens junior 1 og begge jentelaga har kampfri i dag, og Os G19-2 ikkje speler før i ettermiddag, har alle dei tre gutelaga (G15 og G16) spelt første runde.

Alle dei tre rauk ut med knappast mogleg margin:
G15: Tapte for Nest-Sotra på straffekonk etter ein sterk kamp mot tøff motstandar.
G16-1: Tapte i dag for Lyn på golden goal i ekstraomgangar.
G16-2: Tapte i dag 1-2 for Ullensaker/Kisa.

Både G15 og G16-1 møtte lag som vann 1. divisjon i vår. Os G15 skal ha tapt stort for Nest-Sotra i serien, men spelte ein svært god kamp i dag.

– Det var synd at dei rauk ut på straffekonk etter ein kamp som dette, synest dagleg leiar i Os Fotball, Endre Brenne.

– Sterkare jenter med stor speleglede

Dei som har gjort det aller skarpast av laga frå Osbygda er Nore Neset/Os J15 sitt førstelag. I serien speler dei 1. divisjon jenter 17, no er dei tilbake i turneringa der dei i fjor tok seg til semifinale, der dei rauk ut på golden goal.

– Laget er nok endå sterkare enn i fjor, seier Morten Døsen, ein av trenarane som har vore med 2003-årgangen i årevis.

Dei 11 jentene frå 2003-årgangen på Nore Neset har med seg to overårige spelarar (Vilde Drange Veglo og Agathe Lekven) og fire yngre spelarar (Anna Rød, Karoline Hevrøy, Hedda Lyssand Lindbom og 2005-modellen Nora B. Nøss).

– Dei har blitt tøffare av å spela i J17-serien og dei har blitt flinkare til å feira. Vi har sagt at dei må bli flinkare å visa glede etter skåring, også om dei skårer mange mål. Det er ikkje kjekt å vera målskårar på eit 7-0-mål om ikkje det er litt jubel.

Som svar har jentene øvd inn ei rekkje morosame feiringar, frå bowling til domino (bildet).

– Enkelte frykta at dette skulle få oss til å sjå hoven ut, med så mykje feiring, men vi har faktisk fått tilbakemelding frå motstandarar sine foreldre om at det er kjekt å spela mot oss. Ikkje berre fordi jentene speler fin fotball, men fordi dei viser så mykje glede på og av banen.

Over ser du bildeserie frå tysdag, her kan du sjå bildeserie frå dag 1 og dag 2.

Resultat, kamp 3:
Os G18/19-1: 2-0 (9 av 9 poeng = puljevinnar og A-sluttspel)
Os G18/19-2: 1-3 (0 poeng i innleiande = B-sluttspel)
Os G16-1: 1-1 (5 poeng, 2. plass og A-sluttspel)
Os G16-2: 0-1 (1 poeng, 4.plass og B-sluttspel)
Os G15: 4-1 (6 poeng, 2. plass og A-sluttspel)
Nore Neset/Os J15-1: 7-0 (puljevinnar med 22-0 i målforskjell)
Nore Neset/Os J15-2: 2-5 (3 poeng, 3. plass og B-sluttspel)