Fryktar opning

Søfteland skule kan bli opna igjen måndag. Men det er ikkje sikkert at alle foreldra vil senda ungane på skulen.

Kjetil Vasby Bruarøyfredag 23. okt. 2009 14:04

Søfteland skule har vore stengt i to dagar grunna trugsmål. Politiet har førebels ingen mistenkte.

- Vi har fått inn nokre nye tips, og føler at vi har framgang i saka, seier lensmann Rasmus Dalen.

- Kjem skulen til å opna igjen måndag?

- Den avgjerda er det kommuneadministrasjonen som tar, men det ser ut som om politiet kjem til å friskmelda skulen i løpet av helga, seier Dalen.

- Ungane er redde
Mor til to av dei rundt 290 elevane frå 1. til 10. klasse ved skulen meiner foreldra burde fått meir informasjon.

- Vi fekk ei tekstmelding klokka 13.30 onsdag, der det sto at skulen blei stengt torsdag. Så kom ei ny melding seinare på ettermiddagen, der det sto at skulen også kjem til å halda stengt fredag, og at årsaka var trugslar.

Ungane hadde onsdag med eit skriv heim der det sto like lite informasjon.

- Vår yngste trur det skal koma ungdomar og kasta flasker på dei, medan den eldste ungen vår er redd for at nokon skal koma med våpen. Vi har snakka mykje med ungane våre desse dagane, men det har ikkje vore lett.

Rykter
Medan nokre av elevane er redde, har rykter spreidd seg på Søfteland.

- Der går rykter om ein person som skal stå bak, og det er dumt, spesielt om ikkje vedkomande er skuldig.

- Med lite informasjon blir det dessverre mykje snakk. Eg trur skulen ville vore tent med å gå ut med meir.

Vurderer å halda ungane heime
Om mora Midtsiden har snakka med får melding om at skulen opnar måndag, er det ikkje sikkert at ho vil senda ungane sine frå heimen.

- Vi bør få meir informasjon, både om trugsmålet og om status i etterforskinga før vi vil senda ungane på skulen.

- Etter tekstmeldingane og brevet onsdag har det vore heilt stilt. Den einaste informasjonen vi har fått er via media, det er ikkje godt nok.