Full fight og full tribune?
Os mobiliserer for å fylla tribunen når det laurdag er heimekamp for både dame- og herrelaget. Midtsiden trur på målkalas, spelarane trur det blir jamt og tøft.
Handballdamene til Os har vunne 4 av dei første 6 kampane, herrelaget har vunne 3 av 3 og allereie skåra heile 110 mål.
Laurdag (kl 16) tar damene imot Sotra, som har tapt 7 av dei 8 første kampane, herrelaget tar imot Stryn, som har tapt 2 av 2 til no (kl 17.45).
– Det er ingen av oss som undervurderer Sotra. Vi har hatt så mange tøffe kampar mot dei at vi er spent på morgondagens oppgjer og ventar ein tøff kamp mot hardtjobbande motstandarar, seier Emilie Hjertnes.
Sjølv kjem ho og damelaget til å ha fokus på tett forsvarsarbeid, flyt og tålmod i angrep, og meir presisjon på overgangane.
– Mot Kjøkkelvik trur eg ikkje vi hadde éi skåring på kontring, og det er litt ulikt oss, seier Os-kapteinen.
Begge tapa til damelaget til Os denne hausten har vore med eitt mål. I morgon er dei nok svolten på full pott og mange mål.
Styrka herrelag
Herrelaget til Os satsar på opprykk og har fått ein god start på sesongen. Siger i 3 av 3 kampar, med margin på 10, 14 og 16 mål er resultata til no.
– Vi har ein betre og større stall enn på mange år og er no mange nok til å spela meir på treningane. Det er veldig kjekt, både sportsleg og sosialt, synes Trygve Dahl.
Men heller ikkje herrespelarane trur morgondagens kamp blir plankekjøring.
– Langt ifrå. For det første plar vi slita litt mot Stryn, for det andre har eg høyrt rykte om at dei har styrka stallen sin med fleire polske gjestearbeidarar.
– Det blir nok ein tøff kamp i morgon, trur Trygve, tøffaste mann på det sterke Os-laget.
Os Turn mobiliserer fram mot kampane i morgon, med sponsormøte i forkant og konkurranse mellom dei aldersbestemte laga i klubben om kva av laga som stiller sterkast på tribunen - i spelardrakt, sjølvsagt.