Funnen på rek
Den handlaga kajakken som forsvann frå ei brygge fredag tok seg ein lang tur på rek.
- Eg fann kajakken fredag, og tok den med i naustet eg har i Lysefjorden, fortel mannen som i dag kontakta lensmannskontoret.
Eigaren som mista den handlaga tre-kajakken fredag oppdaga ikkje at den var vekke før i 23.30-tida, men reknar med at nokre vindkuler i 21.30-tida løfta kajakken av brygga.
- Vi leita i nærleiken fredag, men hadde ikkje trudd at den hadde rekt heilt til Buena på så kort tid, seier eigaren, som bur vis a vis Museet Lysøen.
Uansett ville det vore for seint, for båten blei funnen allereie ein time etter at den truleg forsvann.
- Den er veldig flott, eg forstår godt at den var sakna. Den låg rett veg, sikkert derfor den har rekt så langt. Men den ser ikkje ut til å ha banka i land, eg trur den skal vera skadefri, seier mannen som fann kajakken då han sjølv var på båttur fredag kveld.