Fusa ser ut til å stilla sterkt på UKM

Årets kulturmønstring for ungdom (UKM), lokalmønstringa for Os og Fusa, blir arrangert i Oseana søndag 12. februar.

• Sjå video frå UKM frå 2012-2016

Det opna for påmelding før jul, og nytt i år er tilbod om kulturverkstad med Eirik Søfteland i forkant av UKM, for dei som ønskjer det.

Førebels er det 30 påmeldte til årets UKM.

– Verken overraska eller uroa

Det er påmeldt seks sceneinnslag med i alt 22 involverte ungdomar frå Fusa, (fem innslag med musikk, eitt med teater), og eitt sceneinnslag frå Os, eit musikkinnslag med éin person.

– Eg er ikkje overraska, det har vore ein trend med færre rockeband dei siste åra, både i Os og på landsbasis.

– Heldigvis har vi hatt ein del andre band, vokalistar og venepar som har stilt med song og gitar, og vi håper naturlegvis at vi får ein god innspurt med endå fleire påmeldte den siste veka, seier Kjetil Osablod Grønvigh frå kultureininga i Os kommune.

Mange talent å ta av

Han gler seg samtidig over at fleire vil stilla ut kunst og delta som arrangør.

Til no er 3 av 3 utstillarar frå Os og 1 av 4 arrangørar på heimebane i Oseana.

– Det er ikkje berre sceneinnslag vi tar imot, folk kan stilla med det dei er flinke til, anten det er sport, foto, maleri eller dans.

– Samtidig, når vi ser kor mange flinke ungdomar det er på ulike arrangement gjennom året, så veit eg at det er mange som kan nytta UKM til å få sceneerfaring.

Meir intimt for publikum

Det er ikkje berre kulturverkstaden som er ny i år, Oseana blir rigga om frå amfi til flatt golv.

– Oseanasalen er stor og romsleg, det kan vera 150-200 i amfiet og likevel sjå litt tomt ut for den som står på scenen.

– I år vil dei unge arrangørane rigga på flatt golv, blant anna med sitjegrupper rundt bord, noko eg trur vil bli ei god oppleving både for publikum og artistar.

Har invitert Tysnes til Os

Arrangørane i Os og Fusa har fått med seg at det førebels også er nokre få påmeldte til UKM på Tysnes.

– Vi har strekt ut ei hand og sagt at dei er velkomne til å ta lokalmønstringa si saman med oss. Kva det blir til er førebels uvisst, men det ville berre vore kjekt om også tysnesingane vil visa seg i Oseana, synest Kjetil.