Fyrer av heile året

I 2011 flytta Ole-Marius Røttingen heim frå Oslo til Øyane, og starta eigen pyroteknisk bedrift som han sidan har drive på fritida.

Les òg:
– Kan vi få sjå 'an ein gong te? (med video)
Godt nyttår til 37.000 (med video)

Sidan har vi høyrd at det har smelt ekstra frå vest i kommunen ved inngangen til nye år, bedrifter og innbyggarar i Øyane har spleisa på oppgradert fyrverkeri frå Røttingen framfor å stå med kvar sitt «sivile» fyrverkeri.

Men det er ikkje berre på nyttårsaftan at Røttingen har oppdrag.

Laurdag fyrte han av fire saluttar for å markera starten på grunnlovsjubileet, og det er ikkje dei første salvane han har skote i år.

Bryllaup, firma og festivalar

Selskapet, som no marknadsfører seg under namnet Propyro.no, blir drifta av Ole-Marius og med broren Fredrik og fetteren Ørjan som medhjelparar.

– Det er framleis ein deltidsjobb, men vi skyter ein del for tida. I mars lagde vi ekstra liv då Ikea i Åsane fylte 30 år, men vi har også vore på oppdrag for Sjøforsvaret, Myrkdalen, for andre firma og i bryllaup.

I sommar står fleire festivalar for tur.

– Tysnesfest (9. - 13. juli) blir, for tredje år på rad, runda av med fyrverkeri frå oss. Også Bygdalarm (3. - 5. juli i Øystese) er blant kundane.

– Vi er også i dialog med Osfest, kanskje blir det ei eksplosiv avrunding på den nye festivalen i Os òg.