Gamling stal showet
Vegvesenet ville nå ungdomen med haldningskampanje fredag. Men dagens syndar blei ein 70-åring som stakk frå staden utan førarkort og skilt.
Vegvesenet har i samarbeid med politiet i dag gjennomført haldningskampanjen Sei ifrå!
– Vi vil nå ungdomen, helst møta bilar med fleire om bord, ta ein prat med dei og visa dei kampanjefilmen, sa Lars Harald Drange frå vegvesenet på post i Vognhallen.
Mann i 70-åra stakk av
Vegvesenet tok i tillegg teknisk kontroll, politiet, som sto langs Byvegen ved Jordmorsvingen, hadde også laseren med seg og målte farten på bilar på veg sør og inn til Os sentrum.
– Vi sto på Søfteland først, mellom Storestraumen og Bergstø, og der blei to bilar avskilta. I tillegg blei ein mann i 70-åra meldt for å kjøra utan gyldig førarkort, då han mangla nødvendig legeerklæring, seier Drange.
Bilen han kjørte var ikkje EU-godkjent og var derfor blant dei to som blei avskilta.
– Etter at vi kjørte frå staden fekk vi melding frå eit vitne at mannen hadde henta bilen sin og kjørt motsett veg, altså mot Bergen medan vi var på veg til Os.
Feil kampanje?
Vegvesenet varsla politiet via 112 som kjørte ut for å sjå etter den eldre mannen som kjørte utan gyldig førarkort i ein bil utan skilt.
– Vi har to ulike kampanjar, Sei ifrå! retta mot ungdom frå 16 til 24 år, og ein som heiter 65+, som er retta mot eldre bilførarar. Det var få ungdomar på vegen i ettermiddag og i kveld, vi kunne visst like gjerne kjørt 65 pluss-kampanjen, seier Drange med eit smil.
I Os var både vegvesenet, UP og Os-politiet i sving, kampanjen i Os varte frå klokka 14 til rundt 21.30.
Mange mangellappar
Etter kontrollen på Søfteland flytta vegvesenet seg til Vognhallen og rundkjøringa i Os sentrum.
– Då hadde vi også med oss kampanjebilen med t-skjorter og andre effektar til utdeling, og film som vi viste til fleire av dei 90 bilistane som kom innom.
Til saman i dag har vegvesenet avskilta to bilar, meldt éin for kjøring utan førarkort, gjeve kjøreforbod til ein annan grunna manglande forsikring, skrive eitt gebyr for å ha gløymt førarkort og gebyr til ein annan for ikkje å ha vognkort med seg.
I tillegg blei det skrive 15 mangellappar.
Politiet skal ha tatt fleire med laseren. Desse tala har vi førebels ikkje fått inn.