Går til Nærbø
Osingen Arne Veim Haugland held fram med handball i 1. divisjon.


Handballtalentet Arne Veim Haugland gjekk frå Os til Fyllingen då han spelte handball på gutenivå.
- Laget eg spelte for, gutar 15, gjekk i oppløysing. Fyllingen var eit av laga vi hadde spelt mot. Eg kom i dialog med trenaren og byrja å trena med dei, seier Veim Haugland.
Med Fyllingen fekk han oppleva å ta både sølv og gull i Spar-serien som 17-18-års spelar. Før førre sesong flytta han til Kristiansand for å gå på BI, men også for å spela handball på høgare nivå.
- Eg fekk 9 førstedivisjonskampar for KIF. Dei siste tre månadane prioriterte eg lesing til eksamen, så då trappa eg ned litt på handballen.
- Er det stor forskjell på 1. divisjon og 2. divisjon?
- Ja, både på trening og i kamp. I 2. divisjon så er det alltid ein og annan spelar som er god, i 1. divisjon er det mange gode, og nokre som er svært gode.
Etter å ha tatt første semester i Kristiansand ville Arne halda fram studiane i ny by. Valet sto mellom Bergen og Stavanger, og handballklubbane Nornen i Bergen og Nærbø i Stavanger.
Nornen ligg an til dobbelt opprykk i år, frå 2. divisjon til 1. divisjon med førstelaget, frå 3. til 2. divisjon med Nornen 2. Nærbø ligg på plassen bak KIF på tabellen for førstedivisjonsavdelinga Arne spelte i denne hausten.
- Speletid er viktig for meg, og Nærbø hadde nettopp fått ein venstre-ving skadd. Eg er sjølv venstre-ving, og Nærbø-spelaren blir truleg ute resten av sesongen, seier Arne, som rett over nyttår flyttar til Stavanger for å halda fram med både BI-studier og handball på nest høgaste nivå.
- Eg håpar og reknar med at overgangen går i orden, papira er til handsaming no, seier Arne.