- Gav meirsmak

Bildeserie:

1 av 6

Kenneth Nordahl-Pedersen frå Søre Øyane fullførte i august Norseman Extreme Triathlon på tida 15.28, på 102. plass blant 230 startande.

I Norseman er det 3,8 kilometer symjing, 180 km på sykkel, blant anna opp Måbødalen og 42 kilometer med løping, der dei siste 17 går opp til Gaustatoppen 1850 meter over havskorpa.

- Eg rauk leddbandet i februar og var tre månadar utan trening etter operasjonen. I løpet fekk eg problem med kneet, men heldigvis klarte eg å fullføra, seier Kenneth, som no ser fram til neste konkurranse.

Nykomar
Frå han var ung har Kenneth likt å springa i fjellet, så det blei ofte turar Møsnuken og Svinningen. Han var krinsmeister i sprint då han var 12 år og hadde beste tid blant 540 løparar på sin 180 meter lange distanse i Holmenkollstafetten i fjor.

- Men bortsett frå at eg er med i ein undervannsrygby-klubb har eg ikkje sumt mykje, og sykling starta eg med først i fjor. Eg kjøpte meg ein landevegssykkel i 2003, men det er berre det siste året eg har trent systematisk, fortel Kenneth.

Kenneth har gått på sports management-linja på Noregs Idrettshøgskule, og skal no bygga på med marknadsøkonomi på BI.

To dagar utan gips
Store delar av oppkjøringa til Norseman blei øydelagt av skadar.

- I februar rauk eg eit leddband i kneet og måtte operera. Då blei det tre månadar utan trening. Så rauk eg hovudsena i tommelen, så då måtte eg trena med gips fram til konkurransen. Gipsen tok eg av to dagar før konkurransen.

Sumte med armane
Kenneth hadde bestemt seg for å spara beina i starten av sitt første triatlon, og sumte 3,8 kilometer omtrent utan å bruka beina.

- Eg hadde øvd på dette på førehand, og eg trur det var lurt. På sykkeldistansen hadde eg mykje å gå på og tok igjen ein del som kom før meg på symjinga.

Ny Norseman neste år
Etter å ha sykla 180 kilometer, blant anna opp Måbødalen, venta 42 kilometer med løping. Og det var her det heldt på å gå gale.

- Eg var ikkje smertefri før start, og det gjekk ikkje lang tid med løping før eg fekk problem. Ei stund frykta eg at eg måtte gje meg, men så tok eg det med ro og gjekk litt, slik at foten heldt til mål.

Og Kenneth kom i mål før over halvparten av dei som starta, på 15.28 timar. Vinnaren kom i mål på drøye 11 timar.

- Sjølv om eg har hatt ein del smerter i kneet også etter løpet, gav dette meirsmak. Eg må inn og sjekka kneet hos lege, men så snart foten er god vil eg melda meg på nokre bakkeløp. I vinter blir det langrenn og neste år skal eg garantert vera med på Norseman igjen, seier Kenneth Nordahl-Pedersen.

Les meir om det som blir kalla verdas hardaste triatlon, på nxtri.com

Under bilda kan du sjå film frå ekstrem-triatlonet. Du får også sjå Kenneth, medan han drikk cola.