Gir alt i Stavanger

Sørmarka arena vert denne helga inntatt av skøyte-eliten som skal knivast om å bli teken ut til verdscup-opninga i Calgary og Salt Lake City. Sverre Lunde Pedersen startar fredag med 1500 meter og fellesstart, medan han laurdag stiller på 5000 meter. Søndag avsluttar han med 1000 meter. Argaste konkurrenten vert vurdert til å vere Håvard Bøkko, som førebels ikkje er kvalifisert.

Gir alt

Lunde Pedersen er klar for å gje jernet under distansane i helga.

- Når det er løp går eg alltid for å gå fortast og best muleg. Det er berre ein uvane å ikkje gje maks i testløp. Eg erklar til å gjere mitt beste, og det skal bli kjekt å gå, seier Lunde Pedersen.

- Målet er å gå gode løp i helga. Tidene er ikkje så nøye akkurat no, men å få til teknisk gode løp. Det heng jo saman, så klarar eg å gå teknisk godt, vil tidene koma etter, meiner han.

Kan blanda seg

Klubbkamerat og halvt osing Sindre Henriksen er nykommar, men knalla til og viste takter til storform i Inzell for ei drøy veke sidan. Av skøyteforbundet vert han vurdert som potensiell til å blanda seg inn i kampen om verdscup-plass.

- Dersom Sindre går like godt som i Inzell vil han ha gode sjansar til å koma med i troppen til verdscup-opninga, er vurderinga frå skøyteesset.

- Det blir spennande å sjå utover vinteren korleis Sindre gjer det, men om han fortset å trena godt slik som no, så trur eg han kan gjere det veldig bra, seier Lunde Pedersen.

Supportertur

- Midsiden arrangerar i samarbeid med Os reisebyrå tur til Stavanger til verdscupstevnet siste helga i januar for å heia deg fram til seier. Kva synest du om det initiativet?

- Eg vart kjempeglad då eg leste om det i Midtsiden. Eg tykkjer det er kjempeflott og gøy at det blir teke eit slikt initiativ. Det er bra for meg og bra for sporten. Det kan bli ei aha-oppleving for mange. Det er noko heilt anna å sjå skøyteløp live enn på tv. Eg håper så mange osingar som muleg blir med, seier Lunde Pedersen.

- Det blir i alle fall ikkje noko problem å gje alt med ei røys med osingar på tribunen, avsluttar Lunde Pedersen.

Britt Halhjem på Os reisebyrå seier det førebels er grei kapasitet på supporterturen.

- Salet er nett starta, og vi reknar med at det tek litt av når turen annonserast hyppigare, seier Halhjem, og minner om påmeldingsfristen som er 10. november.