– Gje han ein stadion!

Video: Stian Blipp er imponert av Eirik Søfteland. – I tillegg til å vera ein fantastisk artist, er han ein varm og god fyr, seier den populære programleiaren.

Andris Hamre
11. mai 2013 - 0:17

Eirik Søfteland måtte sjå seg slått av Siri Vølstad Jensen i Idolfinalen fredag. Programleiar Stian Blipp er full av lovord om osingen.

– For ein artist!

– Han leverer kvar gang. Kvar einaste låt han framfører høyrest ut som ein hit. 

– Eirik er ein artist som kjem til å herje lenge.

– Han har bedt om ein stadion. Gje han ein stadion!, seier den populære programleiaren til Midtsiden rett etter sendinga fredag.

Eit berikande kjennskap

Det er ikkje berre dei musikalske kvalitetene til Eirik Søfteland Blipp sett pris på.

– Eirik er ein varm og god fyr, som har holdt beina på bakken gjennom heile Idol.

– Det har vore eit berikande bekjentskap, seier bergenseren.

Ikkje skuffa

Sjølv om skuffelsen nok var stor blant osingane og andre Eirik-fans, tek rockestjerna det heile med ro.

– Eg er eigentleg ikkje skuffa. Eg er berre glad på Siri sine vegne, ho er dyktig.

Laga si eiga karriere

Som nummer to i Idol får Eirik no ei friare rolle enn om han hadde vunne finalen.

– Det trur eg kan vera ein fordel, seier far Tord Søfteland etter sending.

– NNo vil eg ta det vidare og lage den artistkarriera som eg vil, seier Eirik sjølv.

Lært mykje

Eirik har ikkje fått tilbod om platekontrakt enno, men om musikkbransjen kjenner si besøkelsestid, tek det nok ikkje lang tid før dei første tilboda kjem.

– Eg har lært utruleg mykje om TV- og musikkbransjen gjennom å vera med i Idol.

– Ein fordel er at eg har blitt meir strukturert, enn det eg var tidlegare kor eg tok det meste på impuls, fortel ein ærleg Eirik.

Klar for Kurt'n

Kurt Nilsen inviterte båe dei to finalistane til 16. mai-konsert i Bergen.

– Kva svarar du Kurt Nilsen?

– Sjølvsagt seier eg ja, ler rockaren som nok slepp tenka på å skulle stå tidleg opp laurdag.

– Eg er kjempenøgd med innsatsen og føler meg som ein vinnar.

– No skal eg feste med crewet og gode vener, avslutter Eirik Søfteland.

Allereie sundag skal han i elden igjen, då på Idol gir tilbake. Til Os kjem han truleg måndag eller tysdag.

Video 1:55: Eirik om eigen innsats og vegen vidare (foto: Andris Hamre/Midtsiden.no)

Les meir om

Kultur