Gjekk 16 timar på to dagar

Bildeserie:

1 av 10

Torodd Rimstad fekk i vaksen alder sans for fjellturar. Etter å ha gått over Besseggen åleine i 2009 reiste han rett heim, pakka på nytt og fekk lov av kona å ta ungane med på same tur same sommar.

– Ungane var då 5,5 år og 7 år. Men slitet er fort gløymt, den første morgonen spørte dei kvar vi skulle gå no, seier Torodd.

Maste om meir

I 2010 gjekk turen over Fanaråken (2068 moh), i fjor blei turen utsett så lenge at den ikkje blei noko av.

– Det var meininga å gå i Englefjellet i Kvinnherad. Men anten hadde vi ikkje tid eller så var det stygt vêr. Ungane maste på ny tur, men vi måtte dessverre venta til i år.

Førre helg var det nemleg duka for ny tur, og då hadde Torodd i tillegg til sine eigne ungar, Edel (8,5) og Fartein (10) naboen Tore Kolltveit og sonen Tobias (8) med seg.

Turen gjekk frå Turtagrø til Årdal via Keiserpasset.

Høg drosjerekning og våt start

Turen starta med å parkera bilen ved planlagt målgang i Årdal for å ta taxi til Turtagrø, ein tur som kosta 1300 kroner.

– Det sto vi i, resten av avstandane skulle ikkje kosta noko i kroner og øre.

Etter å ha blitt droppa av ved Turtagrø var det 1,5 time gange før dei rigga leir, telt til ungane og gapahuk til fedrene.

– Det regna tett på morgonkvisten så vi vakna våte og med telt dynka i vatn. Det var også ein del vind, så vi fann eit skur å skjula oss bak då vi skulle eta frukost.

Hytte og laurdagssnop

Laurdagen var målet å gå gjennom Keiserpasset og koma seg ned til Skogadalsbøen.

– Vi hadde plan om å ta begge nettene i telt, men valte å legga oss inn på den betjente DNT-hytta på Skogadalsbøen.

– Og det blei ein velfortent og komfortabel pause med varm dusj, suppe og kjøttkaker til middag og ein kiosk der vi kunne kjøpa laurdagssnop til ungane.

6 + 10 timar gange

Etter 6 timar gange laurdag, når pausane ikkje er rekna med, var det duka for ein endå lengre tur søndag.

– Vi starta klokka 10 og var ved bilen klokka 22. Då vi nærma oss ferdig tur sa Tobias "No har eg gått langt, eg e' sliten, har eg lov til å syta no". Det fekk han lov til, men han gjorde det ikkje.

Felles planlegging og 22 Kvikk Lunsj

På spørsmål om kva som skal til for å få 8- og 10-åringar til å bruka to heile dagar på å gå, også om vêret ikkje er perfekt, svarer Torodd:

– Vi let ungane gå først og dei får sjølvsagt bestemma kor tid vi tar pause.

– Men det er også viktig at dei er med på planlegginga på førehand og at dei får sjå på kartet medan vi er på veg.

– Og når dei spør kor langt det er igjen så legg vi stort sett på minst ein time. Å bomma den andre vegen kan ta motivasjonen frå dei.

Pausane og delmåla er også viktige.

– Eg hadde 22 Kvikk Lunsj med - rein motivasjon pakka inn i papir, ler Torodd Rimstad.

Og det blir tur neste år òg. Men destinasjon er ikkje bestemt.