Gjengangar mistenkt for å vera ufin mot unge damer

Onsdag kveld fekk politiet melding om ein mann som hadde oppført seg upassande på ein bensinstasjon i Os.

Han hadde vore einaste kunde, og var åleine med ei ung dame bak disken.

– Ho fekk kommentarar som gjekk på utsjånad og kropp, og mannen skal ha sagt at han liker unge damer, fortel politioverbetjent Anne Lyssand.

Vedkomande er ein kjenning av politiet, og skal vera same person som trakasserte ei ung kvinne på ein butikk på Amfisenteret for to veker sidan, og som bestilte pizza han nekta å betala nokre dagar etter.

– Jenta på bensinstasjonen syntest situasjonen var ubehageleg, og ringte sjefen sin. Han kontakta politiet. Men så kom ein annan kunde inn på stasjonen, og då skal han ha gått.

– Vi ønskjer å oppretta sak, og om andre blir utsett for liknande, ber vi dei ha låg terskel for å ringa politiet, så vi får ein patrulje raskt på staden, seier Lyssand.