Kultur | 29. jan. 2010

Gjer klar for jubileum

Museet Lysøen gjer klar for Ole Bulls 200-årsjubileum. Torsdag var det programslepp.

Gjer klar for jubileum
Kjetil Vasby Bruarøy
Kjetil Vasby Bruarøyfredag 29. jan. 2010 06:37

Komponisten og fiolinisten Ole Bornemann Bull døydde på Lysøen 17. august 1880. 5. februar i år er det 200 år sidan han blei fødd, og det blir markert med ei rekkje arrangement fleire plassar i Noreg, ikkje minst i Bergen, på Osterøy og på Museet Lysøen.

- Vi startar med 20 konsertar for skuleungdom etter påske og held fram med fleire arrangement frå mai til desember, seier avdelingsdirektør Berit Høgheim.

Kalenderen for jubileumsåret har lagt ute på olebull2010.no ei stund, og blir kontinuerleg oppdatert, torsdag var det lansering av jubileumsprogrammet i Vestlandske Kunstindustrimuseum. Her kan du lasta ned programmet (pdf, ekstern lenkje, olebull2010.no).

Bursdagsfest og ball
Under lanseringa spelte Arve Tellefsen blant anna Bulls «Seterjentens søndag». Tellefsen skal vi sjå og høyra meir til i løpet av året, i tillegg kjem artistar som Stian Barsnes Simonsen, Gest, Helge Jordal, Nils Økland og Sigbjørn Apeland til å markera Bull-jubileet på ulike vis gjennom året.

Først er det bursdagsfeiring med gratis show på Festplassen i Bergen 5. februar, så kjem festframsyning på DNS 12. februar.

Kanskje kommer kongen
Hennes Majestet dronning Sonja har takka ja til å vera «jubileets beskytter», og kjem til å vera i salen under festframsyninga i Bergen i februar. Kanskje kjem dronninga også til Os i løpet av året.

- Det hadde vore stas. Eg hugsar at ho var rørt over oppmøtet av rundt 100 båtar då prinsesse Märtha feira 30-årsdagen sin på Lysøen, det hadde vore kjekt med kongeleg besøk også i år, seier Høgheim.

Auka bemanning
Nils Økland og Sigbjørn Apeland opnar jubileumsåret på Lysøen ein månad før normal sesongstart. Dei skal halda 20 konsertar for skuleungdom. 16. mai blir årets Lysøen Rundt halde, 18. mai er det offisiell sesongopning.

- Det kjem til å skje mykje i løpet av året, men ikkje alt har kome med på kalenderen enno. Vi har nokre datoar som må stadfestast først.

Normalt har Museet Lysøen rundt 10.000 til 12.000 gjestar i året. 2009 blei første år på lenge med ein liten nedgang i besøkstalet, noko som kan ha samanheng både med finanskrise og våt sommar. Uansett er det stor sjanse for god vekst i år.

- Vi kjem til å søkja etter folk, og vi har planar om å starta ein veneforeining, der vi kanskje kan få folk som vil engasjera seg og ta del i ein del av det som skjer på Lysøen. I sesongen har vi 15 tilsette i sving, i år treng vi nok nokre fleire, seier Høgheim.

Oppussing for 3,3 millionar kroner
Museet Lysøen har fått 3,3 millionar kroner til vedlikheld av eigedomen. Arbeidet starta våren 2009 og heldt fram i haust. Men investeringane blir lite synlege for publikum.

- Vi har hatt taksteinane av for å gjera vedlikehald av taket. Steinen skal på igjen. Vi har også brukt mykje pengar på drenering av tomta rundt villaen, som har blitt gravd opp for å betra forholda rundt kjellaren. Til slutt skal det malast, Ole Bulls villa kjem til å ta seg ekstra godt ut i år, seier direktøren.

Eksterne lenkjer:
Museet Lysøen
Ole Bull 2010
Om Ole Bull på Wikipedia

Spennande? Vil du ha ukas høgdepunkt i innboksen?

Les meir om

Tilbod: 1 månad for 1 kr

No kan du lesa Midtsiden.no i 1 månad for kun 1 kr.

  • Tilgang til alt innhald
  • Utan bindingstid
  • Frå 145 kr/md.
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.