Gjev ikkje opp

I mars protesterte elevar over heile landet mot forslag om kutt i talet på lovlege fråværsdagar. I dag viste Kristin Halvorsen at elevane ikkje får gjennomslag.

Kjetil Vasby Bruarøyfredag 09. juli 2010 20:26

Elevena ved vidaregåande skular kan få sletta 14 dagar med fråvær, dersom det kan dokumenterast at fråværet skuldast for eksempel sjukdom eller politisk møteverksemd.

Medan elevrådsrepresentantar jobba for å få auka talet til 20 kom Kristin Halvorsen i vinter med forslag om å redusera dette til 10 dagar.

- Den riksdekkande protestaksjonen i mars var engasjerande og god. Vi på Os Gymnas fekk pris for beste gjennomføring i Hordaland, fortel elevrådsleiar ved Os Gymnas, Vilde Lepsøy til Midtsiden.no.

Men aksjonen gav ikkje ønska effekt, i dag offentleggjorde kunnskapsminister Kristin Halvorsen at det blir kutta i talet på fråværsdagar elevar kan stryka frå vitnemålet.

- Skuffande at ho ikkje lyttar
Trass i sterke reaksjonar frå samtlege ungdomsparti, LNU og Elevorganisasjonen blir talet på fråværsdagar elevar kan stryka frå vitnemålet redusert frå 14 til 10.

- Det er skuffande at Halvorsen ikkje lyttar når så mange elevar seier frå kva dei synes. Dette handlar ikkje om skulk, men om godkjent dokumentert fråvær relatert til for eksempel elevrådsarbeid eller sjukdom. Det er synd at elevar som engasjerer seg, eller som må operera ein fot, kan riskikera å måtta ta eit heilt skuleår om igjen, seier Lepsøy.

- Er det håp om å få den nye regelen omgjort?

- Eg håpar det! No kjem ungdomspolitikarane til å jobba med dette gjennom sommaren, og når skuleåret startar er vi fleire som tar tak.

Raseri i Elevorganisasjonen
- Dette gjev absolutt ingen mening. Dette tiltaket har ingenting å seia for dei som har usunt fråvær, det går derimot utover dei som engasjerer seg, rasar politisk nestleiar i Elevorganisasjonen i Hordaland Suzanne Tvedt i ei pressemelding.

- Kunnskapsministeren peikar på at elever utnytta reglane for å godskriva sitt eige skulk. Det tyder på at det har vore for dårlege og uklåre rammer, ikkje at fraværsregelen i seg sjølv har vore eit problem.

- På grunn av krava til dokumentasjon, som også blir stramma inn av Kunnskapsdepartementet, vil dette kuttet berre ramma dei elevane som har gode grunnar til å vera vekke.