– Glad han ikkje var åleine
Fekk armen riven av: – Eg er glad han fekk hjelp med ein gong, seier arbeidsgjevaren.
Tysdag morgon blei ein 50-åring utsett for ei alvorleg arbeidsulykke medan han jobba i ein borerigg i industriområdet i sørenden av Ulvensletta.
Han hamna i klem og fekk armen riven av.
Politiet blei varsla via AMK klokka 7.50. Mannen blei henta med luftambulanse og frakta til Haukeland universitetssjukehus.
– Heldigvis ikkje åleine
– Fleire av oss som jobbar her var vekke frå staden i ulike ærend. Men heldigvis var det ein underentreprenør rett i nærleiken, seier arbeidsgjevaren til mannen, Inge Hjelle frå I. H. Entreprenørforretning.
Om lag 20 meter frå boreriggen sat ein annan mann i ei gravemaskin. Han såg ikkje kva som skjedde, men mannen som hamna i klem med armen var bevisst og fekk ropt etter hjelp.
– Heldigvis. Kollegaen frå Grindevoll Maskin gjorde ein kjempeinnsats med å hjelpa og varsla, eg tør ikkje tenkja på kva som ville skjedd om han var åleine her då uhellet skjedde, seier Hjelle.
Lang erfaring
Den uheldige entreprenøren skal ha lang fartstid i bransjen.
– Han er den mest erfarne mannen vi har i firma, med rundt 30 år bak seg som entreprenør, mange av dei i denne typen borerigg.
– Kva som har skjedd er umogleg å seia, det blir lettare å forklara når vi har fått snakka med han sjølv. No tenkjer vi først og fremst på korleis det går med han, seier Hjelle.