- Gler oss veldig!
På dagen eit år etter at Gisle Børge Styve og Heine Totland sjarmerte ein fullsett Oseanasal er dei tilbake laurdag.

- Vi gler oss veldig, veldig til å koma tilbake til Os og Oseana, seier ein sprudlande Heine Totland til Midtsiden.
Blir heidersgjestar
Etter ein vellukka konsert i fjor ville radarparet meir enn gjerne ta turen til Os igjen.
- Eg hugsa godt ein episode i frå forrige gang vi var i Oseana, fortel Totland og humrar.
- Eg og Gisle har ein jentegjeng som kan seiast å vera over gjennomsnittet interessert, nokre av desse er frå Os og var til stades i Oseana.
- Det endte med at dei lo så høgt at ekteparet som sat bak dei sendte inn klage og ville ha pengane tilbake.
- I år har vi invitert ekteparet som heidersgjestar og håpar dei får ei betre oppleving.
Tar det som det kjem
Totland og Børge byrja å spela saman frå tid til annan etter at dei møttest på TV-programmet Beat for Beat i 1999.
I 2006 bestemte dei seg for å laga eit nytt konsertprogram med eigne versjonar av mellom anna Rapsody in Blue, heile Purple Rain albumet på 8 minuttar, ispedd ein god del humor mellom nummera. Dei fortel òg om suksessen deira i Tyskland som Gisle Böhse og Die Heine Totland.
På spørsmål om kva osingane kan forventa seg kan ikkje Totland heilt svara.
- Etter å ha spela saman så lenge har vi sikkert nok repetoar til å halda på i 5-6 timar i strekk.
- Vi har aldri ein strikt plan om kva vi skal gjera når vi går på scena, så alle showa våre er ulike.
- Men noko av repetoaret er forventa at vi skal framføra, som for eksempel He`s my brother, ein song eg syng 4 gonger i veka men aldri blir lei, avsluttar Totland.
Sjå dei to i Beat for Beat framføra He´s my brother i videoen nedanfor (3:54).