GNEIS til Os

Os Vocalis-dirigent Tore Kloster stiller med kammerkor på Nore Neset, for dobbelkonsert og vandring.

Kjetil Vasby Bruarøyonsdag 29. sep. 2010 08:43

Sundag 3. oktober kan du høyra Kammerkoret GNEIS på Nore Neset. Du får to konsertar i eitt: både ein kyrkjekonsert i Nore Neset kyrkje og ein verdsleg konsert i Nore Neset Aktivitetshus.

- Konserten ”Fra to sider” er eigentleg to mindre konsertar i ett. Ein kyrkjekonsert, som vert halden i Nore Neset kyrkje og så ein meir laussluppen, verdsleg konsert i aktivitetshuset. Med ein roleg spasertur mellom konsertstadene, varer konserten omlag halvannan time, fortel Tore Kloster.

Dirigent Tore Kloster er eigentleg Kvinnhering, men han har arbeidd som frilansdirigent og songar i og rundt Bergen dei siste 20 åra. Han er mellom anna dirigent for Os Vocalis.

I Hordaland og Spania
GNEIS er eit av dei fremste kora i Bergen, men dei ønskjer også å vera eit kor for heile Hordaland. Følgjeleg har dei, sidan koret vart starta av Tore Kloster i 2005, hatt konsertar ma. på Fedje, i Tyssedal, på Halsnøy og på Voss.

I fjor deltok koret på Tolosa internasjonale korfestival, som er ein av dei store og tradisjonsrike i Europa, som mellom anna inkluderte ein lengre turné i Baskarland i Spania.

Nytt og gamalt
Kammerkoret GNEIS framfører gjerne musikk av nolevande, vestnorske komponistar, og med tekstar av lokale diktarar. Koret er såleis både nyskapande og spennande samstundes som det er djupt forankra i det lokale.

- I tillegg til at ein får høyra nyare musikk på konsertane, er det også innslag av korperler av m.a. Edvard Grieg, Wilhelm Stenhammar og renessansekomponisten Tomas Luis de Victoria, fortel Kloster.

Konserten sundag startar klokka 18.