God Bring-runde av Os
Handball: Os J16 klarte nesten full pott i Drammen.
I helga gjekk første runde i Bring-serien og Os spelte tre kampar i Drammen.
Laurdag vann Os heile 42-25 over Hinna og 26-24 over Just.
– I kampen mot Just låg vi fem mål bak til pause. Jentene viste styrke då dei snudde kampen og vann trass i at dei ikkje fekk alt til klaffa, seier trenar Kenneth Husebø.
Søndag sto det samanslåtte laget Røyken og Hurum for tur. Der blei det tap 29-31.
– Vi leia kampen, men då playmaker Vilde Brattabø fekk raudt kort eitt minutt før pause, blei det litt vanskelegare for oss.
– I tillegg blei Malin Fosen skadd. Malin storspelte fram til dette, så vi sakna ho og Vilde i siste del av siste kamp. Men siger i 2 av 3 er eg nøgd med. Jentene gav 100 prosent!
Neste Bring-runde går i Oshallen 8. og 9. desember. Då speler Os mot Follo, Fjellhammer og Sarpsborg.