– God dialog
Statens Vegvesen inviterte naboar og politikarar til oppstartsmøte om oppgradering av Lepsøyvegen. – Vi fekk mange gode tilbakemeldingar, seier vegvesenet.
Vegkontoret er i oppstarten av reguleringen av fylkesveg 158 Grindavoll - Blindasundet. Måndag inviterte dei naboar, politikarar og berørte partar til oppstartsmøte i kommunestyresalen.
- Det var stor interesse, med ein nesten fullsatt kommunestyresal, fortel plansjef Asle Andås.
Ønskjer innspel
Marianne Skulstad frå vegvesenet presenterte dei skissene og tankane vegkontoret sålangt har.
- Vi er heilt i oppstarten og har ein høyringsfrist til 5. oktober for berørte partar å kome med skriftlege innspel.
- På møte fekk vi presentert korleis vi har tenkt sålangt, fortel Skulstad.
Etter at vegkontoret hadde presentert sine planar blei det opna for diskusjon og kommentarar frå salen.
- Det var ei engasjert forsamling og vi fekk mange gode tilbakemeldingar.
Bygging i 2014?
Når høyringsfristen går ut vil Statens vegvesen sammenfatta innspela og utarbeide eit forslag til reguleringsplan som skal handsamast av plan- og bygningsutvalet i kommunen.
- I tillegg skal sjølve reguleringsplanen ut på høyring, så då blir det enno ein moglegheit for å koma med innspel.
- Kortid ser de for dykk at spaden skal i jorda?
- Dette er eindel av fylket sin regionale transportplan. Den skal handsamast no i midten av oktober.
- Om den blir vedteken i tråd med forslaget, så ligg det 5 millionar inne i 2013 og 55 millionar i 2014.
- Håpet er at vi skal få til ei bygging i 2014, avsluttar Marianne Skulstad.